Tre sulme të koordinuara me bomba artizanale gazi tronditën në orët e para të mëngjesit Selanikun, duke synuar banesat e tre drejtuesve lokalë të partisë në pushtet, Demokracia e Re. Ngjarja mori përmasa tragjike pasi nëna e një prej drejtuesve humbi jetën në spital nga plagët e marra nga zjarri dhe tymi që përfshiu pallatin.
Sulmi më i rëndë u regjistrua në banesën e Afrodhiti Nestora, ku mekanizmi shpërthyes ishte vendosur në një automjet në parkingun pranë hyrjes së pallatit. Pas shpërthimit ndodhi një zjarr i fuqishëm dhe tymi përfshiu tërë godinën. Nëna e Nestorës u plagos rëndë ndërsa përpiqej të shuante flakët; ajo u dërgua e intubuar në repartin e terapisë intensive dhe më pas vdiq. Vetë Nestora ndodhet e shtruar në spital me djegie në duar dhe këmbë dhe probleme të frymëmarrjes si pasojë e tymit. Babai i saj gjithashtu u dërgua në spital me probleme respiratore, por gjendja e tij paraqitet më e mirë. Dy banorë të tjerë të pallatit morën ndihmë të parë për shkak të ekspozimit ndaj tymit.
Dy sulmet e tjera kishin në shënjestër banesat e kryetarit të Demokracisë së Re në Selanik, Zisis Ioakeimovits, dhe ish-deputetit Savvas Anastasiadis. Në një rast mekanizmi ishte vendosur në hyrje të pallatit, ndërsa në tjetrin në një hapësirë përballë banesës, duke shkaktuar dëme materiale por pa raportuar viktima të tjera të rënda.
Hetimet për sulmet i ka marrë në dorë Shërbimi Antiterror. Autoritetet njoftuan se sulmet kryhen pothuajse njëkohësisht dhe se kamerat e sigurisë kanë regjistruar një të ri që dyshohet se la një nga mekanizmat shpërthyes, ndërsa hetimet vazhdojnë për identifikimin e plotë të autorëve.
Ngjarja nxiti reagime politike të forta: kryeministri Kyriakos Mitsotakis dënoi sulmet, i quajti akt terrorist dhe vizitoi Selanikun së bashku me ministrat e Mbrojtjes së Qytetarit dhe Shëndetësisë. Ai deklaroi se shteti do të tregojë tolerancë zero ndaj terrorizmit dhe premtoi se autorët do të identifikohen dhe do të dalin përpara drejtësisë.
