Tre operacione policore janë finalizuar brenda 24 orëve në Kukës dhe Tropojë, duke sjellë në pranga tre persona dhe duke u sekuestruar armë, municion dhe bimë narkotike. Policia njofton se u sekuestruan dy armë zjarri, një armë gjahu, municion luftarak, një armë e ftohtë dhe u evidentuan 42 bimë kanabis.
Në kuadër të operacionit “Befasia”, shërbimet e Komisariatit të Policisë Tropojë, në bashkëpunim me strukturat e Drejtorisë Vendore të Policisë Kukës, arrestuan shtetasin E. M., 45 vjeç, banues në Markaj, Tropojë. Në zbatim të vendimit të Gjykatës, gjatë kontrollit në banesë u gjet dhe u sekuestrua një armë zjarri automatike dhe municion luftarak, të cilat u morën si prova materiale.
Në një operacion tjetër të koduar “Weekend”, në Tropojë u arrestua në flagrancë shtetasi S. H., 38 vjeç, për veprat penale “Kultivimi i bimëve narkotike”, “Prodhimi, mbajtja pa leje e armëve dhe municionit” dhe “Prodhimi, mbajtja pa leje e armëve të ftohta”. Në një zonë të pyllëzuar të Njësisë Administrative Tropojë e Vjetër, policia konstatoi praninë e shtetasit S. H. rreth 50 metra larg një parcele ku ishin kultivuar 42 bimë kanabis, të dyshuara të kultivuara nga ai. Gjatë kontrollit fizik iu sekuestrua një armë zjarri pistoletë me krehër dhe 9 fishekë; në banesë iu gjet një armë gjahu, municion dhe një armë e ftohtë (thikë).
Komisariati i Policisë Kukës, me veprime hetimore të shpejta dhe në bashkëpunim me Drejtorinë Vendore të Policisë Durrës, zbardhi dhe dokumentoi dy raste vjedhjeje me thyerje, një automjeti dhe një lokali. Në kuadër të operacionit “Hija” u kap dhe arrestua shtetasi I. J., 31 vjeç, banues në Krumë, Has. Sipas njoftimit, në orët e para të mëngjesit të datës 26.09.2026 ky shtetas ka vjedhur me thyerje një automjet në pronësi të R. B., si dhe ka thyer dhe vjedhur në një lokal në pronësi të G. M. Si prova materiale u sekuestruan automjeti i vjedhur, një aparat celular dhe një armë e ftohtë (thikë).
Specialistët për Hetimin e Krimeve në Komisariatin e Policisë Kukës, në bashkëpunim me Komisariatin e Policisë Has dhe Komisariatin e Policisë Durrës, vijojnë punën për dokumentimin e vjedhjeve të tjera të dyshuara të kryera nga i njëjti shtetas. Materialet procedurale i janë kaluar Prokurorisë pranë Gjykatës së Shkallës së Parë të Juridiksionit të Përgjithshëm Kukës për veprime të mëtejshme.
