Autoritetet italiane kanë shtuar masat e sigurisë pas trazirave të 17 dhe 18 tetorit, ndërsa priten protesta të reja të shtunën në Milano dhe qytete të tjera. Pas përplasjeve, policia ka zhvilluar kontrolle dhe bastisje në banesa dhe ndaj personave në 18 qytete, me urdhër të autoriteteve gjyqësore dhe me iniciativë të policisë. Digos ka kontrolluar rreth 100 persona, përfshirë 51 të mitur të dyshuar për përfshirje në trazirat e rënda. Operacionet janë kryer në Arezzo, Bari, Bergamo, Bolzano, Bolonjë, Como, Firence, Genova, Lodi, Napoli, Pescara, Padova, Cremona, Verbania, Aosta, Monza, Varese dhe Verona.
Shërbimet e inteligjencës po shqyrtojnë mundësinë që mobilizimi i protestuesve të ketë qenë i organizuar nga persona ende të paidentifikuar. Sipas drejtorit të Agjencisë për Informacionin dhe Sigurinë e Brendshme (AISI), Bruno Valensise, mund të jetë përdorur një mekanizëm i ngjashëm me “modelin e Ceutës”. Dyshimet përfshijnë shfrytëzimin e zemërimit të protestuesve për t’i mobilizuar përmes rrjeteve sociale dhe fletushkave të përgatitura, ndoshta me ndihmën e inteligjencës artificiale. Valensise paraqiti analizën gjatë një seance dëgjimore më 22 tetor para Komitetit Parlamentar për Sigurinë e Republikës (COPASIR). Deri tani nuk ka të dhëna që tregojnë përfshirjen e një strukture të huaj në organizimin e trazirave; specialistët po përpiqen të përcaktojnë se kush mund ta ketë nxitur mekanizmin. Pak ditë më parë, ministri i Mbrojtjes, Guido Crosetto, gjithashtu pati ngritur shqetësimin për mundësinë e një lufte hibride lidhur me ngjarjet në Milano.
Për protestat e së shtunës, autoritetet presin pjesëmarrje të re dhe paralajmërojnë se grupet radikale dhe anarkiste po përpiqen të krijojnë kontakte me pjesëmarrësit e rinj. Valensise ka paralajmëruar se disa persona mund të përpiqen të futen në marshime me qëllim provokimin e incidenteve, veçanërisht përplasjet me forcat e rendit. Milano do të vendoset nën masa të shtuara sigurie, me kontrolle dhe prani të forcave të rendit nga zona e stacionit hekurudhor deri në qendër të qytetit. Në operacion pritet të angazhohen rreth 500 parashutistë të brigadës “Folgore” për patrullime dhe ndërhyrje, ndërsa zëvendëskryeministri Matteo Salvini tha se mund të përdoren edhe automjete të blinduara “Lince” dhe dronë, nëse situata e kërkon. Kryetari i Bashkisë së Milanos, Giuseppe Sala, i ka bërë thirrje tregtarëve që të mos mbyllin bizneset, duke pranuar se vendimi mbetet i tyre, dhe ka paralajmëruar se përhapja e panikut mund ta rëndojë situatën. Autoritetet mbeten në gatishmëri të lartë.
