Një shqiptar 64-vjeçar ka humbur jetën mëngjesin e sotëm në një aksident në Itali, pasi u përplas nga një automjet ndërsa po punonte në një kantier në autostradën A18, në aksin Messina–Catania. Viktima është identifikuar si Mehmeti Hashaim, me origjinë shqiptare dhe banues në Marcianise, në provincën e Caserta-s.
Ngjarja ndodhi pak pas orës 09:00, në kilometrin 43.300 të autostradës, në drejtim të Catanias, pranë zonës së Taorminës dhe viaduktit Alcantara. Sipas raportimeve të mediave italiane, në atë vend po kryheshin punime mirëmbajtjeje dhe viktima ishte duke punuar në kantier kur një automjet ka hyrë në zonën e punimeve dhe e ka përplasur fuqishëm. Nga rindërtimi paraprak i dinamikës, dyshohet se drejtuesja e makinës mund të ketë humbur kontrollin pas një manovre të rrezikshme të kryer nga një tjetër shofer.
Drejtuesja e automjetit u ndal menjëherë pas përplasjes për t’i dhënë ndihmë punëtorit, por për 64-vjeçarin nuk pati asnjë mundësi shpëtimi. Gruaja që e drejtonte automjetin, e tronditur nga ngjarja, pësoi një gjendje të fikëti dhe u transportua në spitalin e Giarres për asistencë mjekësore.
Në vendngjarje kanë mbërritur forcat e Policisë Rrugore dhe ekipet e emergjencës, të cilat po punojnë për të zbardhur plotësisht rrethanat e aksidentit. Për shkak të incidentit tragjik, qarkullimi në autostradën A18 drejt Catanias është ndërprerë dhe autoritetet kanë vendosur devijimin e automjeteve përmes Giardini Naxos dhe rrugës shtetërore SS114.
Policia italiane vijon hetimet për të përcaktuar me saktësi dinamikën e ngjarjes dhe përgjegjësitë lidhur me aksidentin që i mori jetën punëtorit shqiptar. Autoritetet lokale dhe ekipet e emergjencës mbeten në vendin e ngjarjes ndërsa vazhdojnë veprimet hetimore dhe sigurimin e zonës.

