Dy fëmijë, 2 dhe 4 vjeç, u gjetën të pajetë mesditën e sotme brenda makinës së familjes së tyre në Carpentras, në jug të Francës, ndërsa vendi po përballet me një valë ekstreme të të nxehtit. Prokurorja e Carpentras, Helene Mourez, tha se shkaqet e sakta të vdekjes ende nuk janë përcaktuar, por dyshohet që temperaturat e larta mund të kenë luajtur rol vendimtar në tragjedi.
Fëmijët u zbuluan rreth orës 13:10 në automjetin e parkuar pranë banesës së tyre, pasi nëna e tyre, 33-vjeçare, u kthye nga pazari. Pavarësisht përpjekjeve të ekipeve të emergjencës për t’i ringjallur, të dy humbën jetën. Mediat lokale raportojnë se ende nuk dihet se si u futën fëmijët në makinë dhe sa kohë qëndruan brenda saj; hetimet paraprake sugjerojnë se ata mund të kenë hyrë në automjet pa dijeninë e nënës.
Ngjarja vjen në kohën kur Franca po përjeton një nga valët më të forta të të nxehtit të regjistruara ndonjëherë. Autoritetet kanë vendosur 49 departamente në nivelin më të lartë të alarmit për temperaturat ekstreme, ndërsa mbi 90% e popullsisë pritet të preket nga kushtet e motit. Investigimet për rrethanat e vdekjes së fëmijëve vazhdojnë, ndërsa autoritetet lokale po punojnë për të sqaruar si ndodhi ngjarja dhe për të përcaktuar nëse faktorët klimatikë ishin shkak drejtpërdrejt.
