Në Bruksel disa persona u gjetën të pajetë brenda një ashensori në një ndërtesë që po rikonstruktohej pas një zjarri, ngjarje e konfirmuar nga Zyra e Prokurorit të Punës në Bruksel. Numri i saktë i viktimave nuk është bërë publik, por dyshohet për rreth 20 viktima. Autoritetet njoftuan se gjashtë persona rezultojnë ende të zhdukur dhe hetuesit po shqyrtojnë mundësinë që ata të jenë bllokuar në një ashensor të dytë, ku ekipet e shpëtimit ende nuk kanë mundur të depërtojnë.
Zjarrfikësit arritën të krijojnë një hapje të vogël në një nga ashensorët, ku u gjetën disa viktima, por sasia e personave brenda mbetet e pasaktë. Është e mundur që të zhdukurit të jenë në atë ashensor, por nuk përjashtohet të ketë persona edhe në ashensorin e dytë ose në pjesë të tjera të ndërtesës.
Sipas autoriteteve, zjarri shpërtheu pak para orës 08:00 sipas orës lokale në katin e dytë të ndërtesës, e cila ishte në proces rikonstruksioni. Flakët fillestare u vunë shpejt nën kontroll, por zjarri u përhap në boshtin e ashensorit dhe shkaktoi një vatër të dytë, e cila më pas u neutralizua nga zjarrfikësit. Shkaqet e zjarrit mbeten të paqarta dhe janë subjekt i hetimeve.
Nga incidenti mbetën të plagosur tre persona: dy punëtorë me djegie u transportuan në Spitalin Ushtarak në Neder-over-Heembeek, ndërsa një zjarrfikës mori ndihmë mjekësore në vendngjarje për shkak të lodhjes nga temperaturat e larta. Të gjithë punëtorët e tjerë u evakuuan nga kantieri dhe u dërguan në një zonë të sigurt, ku morën mbështetje psikologjike nga ekipet e Kryqit të Kuq.
Autoritetet aktivizuan planin e emergjencës dhe protokollet për menaxhimin e krizave mjekësore dhe psikosociale. Ndërtesa OXY, ku ndodhi tragjedia, ishte planifikuar të përfundonte si një kompleks me apartamente, restorante dhe një bar në tarracë. Hetimet për të përcaktuar shkakun dhe rrethanat e ngjarjes janë në vijim.
