Interpol Tirana njofton se katër persona janë shpallur në kërkim ndërkombëtar për akuza që përfshijnë trafikun e narkotikëve, pjesëmarrjen në organizatë kriminale, kanosje dhe kultivim të bimëve narkotike, si rezultat i katër fazave të operacionit të koduar “The Wanted”. Në bashkëpunim me homologët ndërkombëtarë janë finalizuar tre ekstradime, ndërsa një person është arrestuar në Itali me qëllim ekstradimi drejt Shqipërisë. Të kërkuarit janë lokalizuar në Itali, Zvicër dhe Spanjë, dhe ndaj tyre janë lëshuar urdhra dhe vendime arresti për vepra të ndryshme penale.
Shtetasi H. N., 38 vjeç, u ekstradua nga Italia. GJKKO, me vendimin e datës 30.04.2025, i kishte caktuar masën “Arrest në burg” për veprat “Trafikimi i narkotikëve”, kryer në bashkëpunim në kuadër të grupit të strukturuar kriminal, dhe “Kryerja e veprave penale nga organizata kriminale apo grupi i strukturuar kriminal”. Hetimet dyshojnë se H. N. ka qenë pjesëtar i një grupi që ka trafikuar lëndë narkotike nga Amerika e Jugut drejt vendeve të Evropës dhe ka investuar të ardhura të fituara nga kjo veprimtari.
Shtetasi M. K., alias M. M., 28 vjeç, u ekstradua nga Zvicra. Gjykata e Beratit, me vendimin e datës 17.03.2025, i kishte caktuar masën “Arrest në burg” për veprën “Shtrëngimi me anë të kanosjes ose dhunës për dhënie pasurie”, kryer në bashkëpunim. 28-vjeçari dyshohet se në vitin 2024 në Berat, së bashku me dy persona të tjerë, ka dhunuar dhe kanosur disa herë shtetasin P. Z. për dhënien e një shume parash.
Shtetasi A. B. u ekstradua në Spanjë pasi autoritetet gjyqësore spanjolle, më datë 14.12.2020, kanë lëshuar urdhër arresti për të për veprat “Organizata kriminale” dhe “Kultivimi i bimëve narkotike”. Ai akuzohet se ka qenë pjesëtar i një organizate kriminale që gjatë viteve 2019–2020 ka kultivuar dhe trafikuar Cannabis sativa në Spanjë.
Në Itali u arrestua me qëllim ekstradimi drejt Shqipërisë shtetasi E. Z., 40 vjeç, lindur në Vlorë, i dënuar në vitin 2018 nga Gjykata e Vlorës me 3 vjet burg për “Kultivimi i bimëve narkotike”. Në vitin 2015 në banesën e tij u gjetën bimë narkotike. Interpol Tirana po bashkëpunon me Interpol Romën për finalizimin e procedurës së ekstradimit, që E. Z. të vuajë pjesën e mbetur të dënimit, 2 vjet burgim.
