Sezoni i ri i Top Channel nis më 7 shtator me një programacion të përditësuar që synon t’u përgjigjet kërkesave të publikut. Rëndësi u jepet emisioneve të përditshme, spektakleve familjare, lajmeve me saktësi e besueshmëri, personazheve të rinj në ekran, historive njerëzore dhe debateve që nxisin diskutim. Ky sezon shënon hapjen e një kapitulli të ri pas 25 vjetësh historie të kanalit.
Drejtuesja Ekzekutive e Përmbajtjes dhe Programeve, Sara Hoxha, shpjegon se ndryshimet i dikton koha dhe janë të domosdoshme për të ruajtur marrëdhënien me audiencën. “Kemi 25 vite histori dhe jemi shumë krenarë për këtë. Por nuk mendoj se historia mjafton. Nuk mund t’i themi publikut: Na zgjidhni, sepse na keni zgjedhur. Duhet t’i japim çdo ditë një arsye të re për të na zgjedhur,” citon ajo, duke theksuar se çdo iniciativë e re dhe çdo fytyrë e re që bashkohet bëhen për qëllimin që Top-i të vazhdojë të ecë përpara dhe të mos humbasë atë që e ka bërë Top-in TOP.
Ndërtimi i këtij kapitulli të ri, thotë Hoxha, nuk bëhet duke parë pas, por në një proces evolucioni që përparon me ritmin e shoqërisë. “Pas 25 vitesh kjo është ndoshta sfida më e madhe, të guxojmë, të ndryshojmë, por të mbetemi gjithmonë zgjedhja e parë e shqiptarëve. Jo vetëm se ne e meritojmë, por e duam këtë vend, e duam televizionin, e vlerësojmë publikun tonë kaq besnik,” shprehet ajo.
Top Channel argumenton se ndryshimet në Shqipëri, zhvillimet politike dhe transformimet në mënyrën e informimit dhe argëtimit kërkojnë një sezon që i jep publikut atë që dëshiron nga media që ka qenë pjesë e jetës së tyre për një çerek shekulli. Stafi synon të ndjekë cikle suksesi, që mbyllen për t’i hapur vendin sfidave të reja, me qëllim garantimin e një të ardhmeje pranë shqiptarëve dhe të qëndrojë gjithmonë ndër të parët.
