E premtja në mbrëmje do të jetë e dedikuar boksit në Tiranë, ku eventi “Grushti i Hekurt” organizon ndeshje të boksit profesionist dhe olimpik në sheshin “Italia”. Ndeshja kryesore sjell përballjen e Alban Bermetës me kampionin e Afrikës nga Namibia. “Ndeshja kryesore është Alban Bermeta që ka përballë kampionin e Afrikës nga Namibia. Një nga ndeshjet më të bukura ta natës, spektakël i garantuar. Shumë emra të mëdhenj të boksit shqiptar. Roxhers Muslia kampion bote U-25 si dhe Alban Beqiri. I njohur për boksimin e bukur,”-u shpreh promotori i boksit Nelson Hysa.
Përveç dueleve kryesore profesioniste, aktiviteti përfshin edhe përballje të kombëtares shqiptare në boksin olimpik (amator). “Jemi përgatitur shumë për këtë aktivitet. Kemi kontaktuar kombëtaren e Greqisë e cila do të jetë prezente për ndeshjen e boksit olimpike. Gjithashtu do të jenë edhe 9 ndeshje të boksit profesionist,”-deklaroi Florend Kalivopulli, president i FSHB. Sipas tij, Greqia ka ardhur me një ekip të fortë dhe ka shprehur shpresën që boksierët profesionistë “të bëjnë më të mirën për veten e tyre”: “Sipas infove që kemi edhe Greqia ka ardhur me një kombëtare shumë të mirë. Shpresojmë që edhe boksierët profesionistë të bëjnë më të mirën për veten e tyre,”-u shpreh Kalivopulli.
“Grushti i Hekurt” zhvillon disa aktivitete gjatë vitit në Shqipëri, ndërsa edicioni i qershorit është bërë tashmë tradicional. Promotori Nelson Hysa thekson rëndësinë e periudhës dhe dëshirën për të kombinuar sportin me argëtimin: “Çdo vit në këtë periudhë do të kemi këtë aktivitet tradicional për të shpalosur vlerat më të mira të sportit, por edhe të muzikës sepse do të jetë një natë argëtuese për të gjithë pjesmarrësit,”-tha Hysa.
Programi i eventit përfshin ndeshje edhe mes vajzave dhe nis me duele midis fëmijëve të talentuar. Të gjitha sfidat parashikohen të zhvillohen në ambient të hapur. Top Channel
