UEFA sapo ndërmori masa disiplinore ndaj Crvena Zvezda për koret diskriminuese dhe antishqiptare të tifozëve në ndeshjen me Viktoria Plzen. Megjithatë, këtë të premte institucioni evropian mori një kërkesë për përjashtimin e klubit serb nga Conference League, të dorëzuar nga Qendra Përkujtimore e Srebrenicës, e cila mban kujtimin e më shumë se 8,000 civilëve të vrarë në 1995 nga forcat serboboshnjake nën komandën e Ratko Mladić.
Në komunikatën e saj, Qendra Përkujtimore tërhoqi vëmendjen te ngjarjet e sfidës së së enjtës mes Viktoria Plzen dhe Crvena Zvezdës në Çeki, duke denoncuar banderolat e tifozëve serbë që glorifikonin Mladicin, i njohur si “Kasapi i Bosnjës” dhe i dënuar për gjenocid dhe krime lufte ndaj njerëzimit. Sipas komunikatës, tifozët kishin shpalosur një banderolë ku shkruhej “Gjeneral, lavdi e madhe dhe faleminderit” dhe njëkohësisht thërrisnin emrin e Mladicit. Qendra raporton gjithashtu se klubi pas ndeshjes publikoi në rrjetet sociale foto të Mladicit me komente që e glorifikonin.
Institucioni thekson se, kur një klub përdor me vetëdije kanalet e tij zyrtare për të dërguar mesazhe që glorifikojnë një person të dënuar për gjenocid, nuk mund të argumentohet se bëhet fjalë vetëm për veprimin e tifozëve, por është çështje e raportit institucional të klubit me vlerat mbi të cilat bazohet futbolli evropian. Në komunikatë kujtohet edhe një precedent disiplinor të ngjashëm, në të cilin UEFA kishte arritur në përfundimin se glorifikimi i Mladiç nuk përbënte mesazh fyes ndaj viktimave të krimeve për motive etnike dhe fetare.
Duke u nisur nga këto elemente, Qendra Përkujtimore e Srebrenicës kërkon zyrtarisht nga UEFA hapjen e një procedimi disiplinor urgjent për publikimin e fotografive përmes kanaleve zyrtare të Crvena Zvezdës si një rrethanë veçanërisht e rëndë dhe sanksionimin e klubit, deri te përjashtimi përfundimtar.
Në aspektin sportiv, Crvena Zvezda kishte fituar 3-0 në ndeshjen e parë me Viktoria Plzen, por u eliminua në kohë shtesë në sfidën e kthimit 5-1; tani do të luajë në fazën e Ligës në Conference League.
