Policia e Shtetit ka forcuar masat e sigurisë për protestën e paralajmëruar sot në Tiranë, pas thirrjeve në rrjetet sociale për grumbullim të personave të maskuar dhe për përdorimin e mjeteve të rrezikshme për ushtrimin e dhunës. Në një deklaratë, Albert Nushi, shef i Sektorit të Drejtimit në Departamentin për Sigurinë Publike, njoftoi nisjen e hetimeve për identifikimin e personave përgjegjës dhe apeloi që protestuesit të distancohen nga aktet e dhunës dhe të respektojnë ligjin.
Policia bëri me dije se ka konstatuar thirrje të shumta për sulme ndaj punonjësve të Policisë, shkatërrim dhe djegie të automjeteve policore, si dhe dëmtime të pronës publike dhe private, si gjatë ditës së djeshme ashtu edhe në orët e para të mëngjesit. Për këto thirrje është nisur procedimi penal, ndërsa strukturat e specializuara po kryejnë veprime hetimore për identifikimin dhe vënien para përgjegjësisë ligjore të autorëve.
Në komunikatën e Policisë përmenden thirrjet për grumbullim të personave të pajisur me lëndë piroteknike, bomba Molotov, sfera dhe vida metalike, shkopinj druri e metalikë, gurë dhe sende të tjera të forta, me qëllim ushtrimin e dhunës gjatë tubimit. Policia paralajmëron se personat që synojnë të shfrytëzojnë tubimin për të ushtruar dhunë, pavarësisht maskimit apo përpjekjeve për të fshehur identitetin, do të identifikohen dhe përballen me përgjegjësinë ligjore.
Apelohet që pjesëmarrësit të distancohen nga persona të maskuar e të dhunshëm dhe të mos marrin pjesë në veprime të paligjshme. Prindërve u bëhet thirrje të mos lejojnë fëmijët të marrin pjesë në tubime apo të qëndrojnë në ambiente ku siguria e tyre mund të rrezikohet nga përplasjet e paralajmëruara; mbrojtja e fëmijëve cilësohet si përgjegjësi e përbashkët.
Gazetarëve dhe operatorëve mediatikë u kërkohet të respektojnë perimetrat e sigurisë dhe udhëzimet e Policisë për të shmangur rrezikimin e jetës dhe shëndetit. Policia thekson se e drejta kushtetuese për të tubuar paqësisht do të respektohet dhe mbrohet, por nuk mund të shërbejë si justifikim për dhunë; shërbimet policore do të veprojnë në përputhje me ligjin dhe me parimin e proporcionalitetit në reagim ndaj çdo akti dhune.
