Disa herë gjatë kësaj vere në Angli temperaturat kaluan 35 gradë, duke e bërë vapën të padurueshme në shtëpi për ata që nuk kanë kondicioner, të cilët janë të rrallë në familjet britanike. Thatësira dhe mungesa e reshjeve në Angli dhe Uells janë më të gjata dhe më të tejskajshme që nga fillimi i regjistrimeve meteorologjike 190 vjet më parë. Britania po shkon drejt korrikut të tretë me më pak reshje dhe mund të përjetojë verën kombëtare më të thatë që nga viti 1868.
Sipas Met Office, në Angli gjatë korrikut ranë vetëm 5.5 mm shi deri më 30 korrik, shifër që është sa gjysma e rekordit të mëparshëm prej 13 mm në vitin 1911. Zyrtarisht, mbi gjysmën e territorit të Anglisë është shpallur gjendje thatësire. Hapësirat që zakonisht janë të gjelbra tashmë duken si fusha të korrura me grurë, me bimësi të verdhë. Për shkak të mungesës së reshjeve kanë filluar kufizime për përdorimin e ujit në kopshtari dhe për ujitje në familje, masa që prekin rreth 20 milionë banorë.
Thatësira dhe temperaturat e larta kanë pasur edhe pasoja shëndetësore: vlerësohet se mbi 2,800 vdekje kanë ndodhur për shkak të motit të nxehtë në periudhën maj–qershor, shifër që dyfishon numrin e vdekjeve të të gjithë vitit të kaluar. Deri tani në Britani janë regjistruar shtatë ditë me temperatura mbi 35 gradë, duke thyer rekordin e pesë ditëve të vitit 1976 dhe duke barazuar rekordin e vitit 2020, dhe kjo vetëm brenda dy muajve.
Gjendja është përkeqësuar nga mungesa e sistemeve të ftohjes në shtëpi, që historikisht nuk janë të përhapura në Mbretërinë e Bashkuar. Kjo pasqyrohet veçanërisht në transportin publik: metrosë dhe autobusët shpesh ngjajnë me serrat e mbyllura në verë, duke vështirësuar më tej jetën e përditshme gjatë valëve të nxehtësisë.
