Ministria e Mbrojtjes bëri bilancin e ditës mbi vatrat e zjarrit, duke njoftuar se 8 vatra mbeten aktive në qarqet Tiranë, Fier, Durrës, Gjirokastër dhe Dibër. Në operacionet e menaxhimit janë angazhuar 165 forca operacionale, përfshirë 85 efektivë të Forcave të Armatosura, me 7 misione ajrore me helikopterë dhe 2 misione me avionë Air Tractor.
Në Dajt, bashkia Tiranë, është riaktivizuar zjarri në pyllin me pisha mbi tunelet e Qafë Mollës. Në terren janë 22 forca të MZSH-së dhe ADZM-së Tiranë, ndërsa operacioni po mbështetet nga helikopteri i Forcave të Armatosura. Në Priskë të Madhe vijon puna për shuarjen e zjarrit dhe aktualisht nuk ka rrezik për zonat e banuara.
Në Drenie, bashkia Patos, zjarri që ishte vënë nën kontroll është riaktivizuar në thellësi të pyllit; operacioni po mbështetet nga 2 avionë Air Tractor dhe raportohet për përmirësim të situatës. Në Krujë vijon puna në dy vatra aktive: në lagjen Abaze zjarri u përhap për shkak të erës, por aktualisht nuk paraqet rrezik për zonat e banuara; në Krastë–Halil situata u përkeqësua në orët e para të mëngjesit duke rritur rrezikun për banesat, por ndërhyrja me 2 helikopterë normalizoi situatën dhe forcat operacionale vijojnë punën për kontrollin dhe shuarjen e plotë të vatrës.
Në malin e Nëmerçkës, bashkia Përmet, operacioni për shuarjen e zjarrit vazhdon dhe vatra nuk paraqet rrezik për zonat e banuara. Një vatër e re është evidentuar në malin Dhëmbel, mbi fshatin Badilonjë, ku forcat e MZSH-së Përmet po punojnë për shuarjen e saj. Në Gurë-Lurë, bashkia Dibër, është evidentuar zjarr në sipërfaqe me pyll pishe dhe kullotë, dhe po punohet intensivisht për shuarjen e vatrës.
AKMC dhe strukturat e sistemit të mbrojtjes civile mbeten në gatishmëri të plotë dhe vijojnë monitorimin dhe koordinimin e operacioneve në terren, me fokus të veçantë në vatrat që paraqesin rrezik për përhapje dhe për zonat e banuara.
