Shërbimi Gjeologjik i SHBA-së (USGS) ka paralajmëruar se tërmeti i fuqishëm që goditi Venezuelën mund të ketë shkaktuar midis 10,000 dhe 100,000 viktima, sipas vlerësimeve paraprake të sistemit të tij të monitorimit. USGS sqaron se ky shifër nuk përfaqëson numrin real të të vdekurve, por është një parashikim statistikor i hartuar për të ndihmuar autoritetet dhe ekipet e emergjencës në planifikimin dhe organizimin e reagimit ndaj katastrofës.
Vlerësimi është përgatitur nga sistemi PAGER, i cili kombinon të dhëna mbi karakteristikat e tërmetit dhe ekspozimin e popullsisë. Në analizën e tij PAGER merr në konsideratë magnitudën, thellësinë dhe intensitetin e lëkundjeve të tokës, si dhe numrin e banorëve të ekspozuar ndaj rrezikut. Këto parametra krahasohen me të dhëna nga tërmete të ngjashëm të regjistruar më parë për të parashikuar pasojat potenciale dhe nevojën për burime emergjente.
Specialistët e USGS theksojnë se bilanci final i viktimave dhe dëmeve varet edhe nga faktorë të tjerë që nuk matet drejtpërdrejt nga modeli, si cilësia dhe rezistenca e ndërtesave, dendësia e popullsisë në zonat e prekura dhe ora kur ndodhi fatkeqësia. Këta faktorë mund të rrisin ose zvogëlojnë numrin e viktimave të vlerësuara nga modelimi statistikor.
Për ngjarjen USGS ka shpallur nivelin më të lartë të alarmit, të njohur si “Alarmi i Kuq”, një kategori e rezervuar për tërmete me pasoja potencialisht katastrofike dhe e cila shpallet rrallë, vetëm një ose dy herë në vit. Vlerësimet e PAGER pritet të përditësohen gjatë ditëve në vijim ndërsa autoritetet lokale dhe ekipet ndërkombëtare vazhdojnë operacionet e kërkim-shpëtimit dhe mbledhjen e të dhënave në zonat e prekura.
