Bilanci i viktimave nga tërmetet binjake që goditën Venezuelën më 24 qershor ka arritur në 3,811 të vdekur, ndërsa dëmet ekonomike nga katastrofa natyrore vlerësohen në 6.7 miliardë dollarë. Tërmetet me magnitudë 7.2 dhe 7.5 ballë goditën Venezuelën me vetëm 39 sekonda diferencë, duke shkaktuar shkatërrime të mëdha, veçanërisht në zonat veriore të vendit dhe në shtetin La Huira. Autoritetet raportojnë gjithashtu 16,740 të plagosur dhe 17,907 persona që kanë mbetur pa strehë; rreth 6,462 persona janë shpëtuar dhe ndihma u është ofruar më shumë se 86,000 familjeve të prekura.
Bilanci i ri i viktimave u bë publik nga kryetari i parlamentit të Venezuelës, Jorge Rodriguez, i cili tha se numri i të vdekurve është rishikuar nga 3,685 në 3,811 persona. Në përpjekje për të siguruar fonde për rindërtimin, presidentja në detyrë e Venezuelës, Delcy Rodriguez, i ka kërkuar Mbretit Charles III lirimin e rreth 30 tonëve ar që mbahen në Bankën e Anglisë. Rodriguez deklaroi se ari i përket popullit venezuelian dhe se duhet të përdoret për të përballuar pasojat e tërmeteve. Kërkesa vjen pas përpjekjeve të mëparshme të Karakasit për të siguruar kontrollin mbi rezervat e tij financiare jashtë vendit, të cilat janë bllokuar për shkak të mosmarrëveshjeve politike dhe sanksioneve ndërkombëtare.
Organizata e Kombeve të Bashkuara ka vlerësuar se dëmet nga tërmetet arrijnë në 6.7 miliardë dollarë, një shumë që përbën rreth 6% të Prodhimit të Brendshëm Bruto të Venezuelës. Kriza ekonomike e viteve të fundit në vend pritet ta bëjë më të vështirë procesin e rindërtimit. Autoritetet venezueliane kanë kërkuar ndihmë ndërkombëtare dhe lirimin e fondeve të ngrira për të përballuar pasojat e katastrofës, ndërsa përpjekjet për përdorimin e rezervave të arit në Bankën e Anglisë synojnë sigurimin e mjeteve financiare për rehabilitimin dhe rindërtimin e zonave të goditura.
