Një tërmet i fuqishëm me magnitudë 6.1 goditi zonën e Karaibeve, me lëkundje të ndjera deri në Florida, ku kombëtarja e Anglisë po zhvillon përgatitjet për Kupën e Botës. Sipas Shërbimit Gjeologjik të Shteteve të Bashkuara (USGS), epiqendra ishte regjistruar në perëndim të Kubës, rreth 650 kilometra nga Florida qendrore, me një thellësi prej rreth 16 miljesh.
Lëkundjet u ndjenë në qytete të mëdha të Floridas, përfshirë Miami, Orlando dhe Jacksonville, dhe raportohet se disa ndërtesa u evakuuan për arsye sigurie. Zona turistike e Floridas, përfshirë “Disney World”, pati raportime nga vizitorët për dridhje të forta të tokës. Autoritetet amerikane konfirmuan se nuk kishte rrezik për cunami dhe deri tani nuk janë raportuar dëme të mëdha apo viktima.
Epiqendra pranë brigjeve perëndimore të Kubës shkaktoi lëkundje të forta dhe panik mes banorëve, të cilët sipas mediave lokale dolën në rrugë dhe braktisën shtëpitë nga frika. Dëshmitarët në Kubë përshkruan lëkundjet si ndër më të fortat e ndjera në dekada në një rajon që rrallë përjeton tërmete me këtë madhësi.
Kombëtarja e Anglisë gjendet aktualisht në Florida për përgatitjet e ndeshjeve miqësore para Kupës së Botës dhe do të përballet me Kosta Rikën në Orlando gjatë kësaj jave. Stërvitjet e “Tre Luanëve” po zhvillohen në West Palm Beach, ndërsa më vonë pritet që ekipi të zhvendoset në Kansas City për fazën përfundimtare të përgatitjeve.
