Për herë të parë Partia Demokratike hyn e përçarë në një përballje elektorale dhe kjo ka krijuar presion te demokratët të cilët nuk dinë ku të pozicionohen. Kështu u shpreh deputeti i PD Saimir Korreshi në një intervistë në “Radarin Informativ” në Abc, ndërsa theksoi se me 2 kandidatë sipas tij PD rrezikon të humbasë në zgjedhjet e pjesshme lokale që do të mbahen më 6 mars në 6 bashki.
“Është një presion shumë i madh. Trysni përballë të gjithë demokratëve lushnjarë të cilëve po i vemi si dy gjysma gjeli . Nëse të dy kandidatët që do të dalin do jenë brenda nesh brenda kësaj armate që prodhuan këto vota në Durrës. Njerëzit do ndahen në dy lloj, përveç PS, do ketë përballë dhe shokët e vetë. Nuk po arrijmë dot ti sjellim në një mendje demokratët. Si pasojë presioni është më i madh. Me dy kandidatë rrezikohet që të humbet. Do ndaheshin demokratët dhe kjo do ishte shumë e rëndë. Këto s’janë ditët më të lehta të PD”, tha deputeti.
Formula e fitores për Korreshin është që të shkojnë me një kandidat. Deputeti shtoi se fillimisht duket marrë bashkia, pastaj me ironi ai tha se le të kapin dorezat e boksit.
“E vetmja formulë është që ne demokratët këtu në bazë të mendojmë për të fituar bashkitë dhe jo kujt t’i shërbejmë Berishës apo Bashës. Unë jam me idenë që fillimisht të marrim bashkinë e Lushnjes pas kaq vitesh pastaj le të marrim dorezat e boksit dhe të zihemi përsëri. Nuk është lufta jonë e demokratëve këtu. Ti kthejmë bashkinë e Lushnjes demokratëve. Të shkojmë me një kandidat. Do na qeshin se do thonë prapë ata burgaxhinjtë ju rrahën. Do jetë turpi jonë. Duke na parë me dy kandidatë nuk krijohet fryma e bashkimit. Pavarësisht presionit ne kemi akoma më shumë mundësi dhe potencial. Kandidati i prodhuar nga ana jonë bën të pamundur për ta fituar këtë garë. Ende s’kemi një emër të përbashkët për kandidat. Nëse dega del solide e fortë dhe e bashkuar ne i imponohemi Tiranës dhe i themi ky është kandidati jonë”, shtoi ai.
Korreshi u shpreh se ia ka propozuar Bashës që të shkojnë me një kandidat të përbashkët në zgjedhje dhe sipas tij kreu i PD ka rënë dakord.
“Basha është dakord për një kandidat. Unë them që PD të dalë me një kandidat Lushnja, s’më intereson nëse bashkohen Berisha ose Basha”.
Nëse në zgjedhje shkohet me dy kandidatë, kjo përçarje do t’i kushtojë PD. Nëse shkojnë të bashkuar Korreshi tha se fitorja është e sigurtë, pasi sipas tij PS nuk ka bërë asgjë dhe qytetarët janë të pakënaqur.
“Po të hyjë PD e bashkuar, në Lushnje ka shumë të pakënaqur nuk është bërë asgjë përveçse është shfrytëzuar për nevoja personale. S’ka bërë asgjë në këto vite dhe qytetarët e kanë ndjerë këtë pjesë. Lushnja nuk është bastion i së majtës, gjithmonë është tallur. Lushnja është keqmenaxhuar gjatë gjithë kohës, duke sjellë kandidatë që më parë kanë kandiduar për PS dhe na u servirën si të PD. Në 2015 kjo pseudoreformë territoriale ishte një dështim i madh. Të bëjnë armëpushim, të marrin bashkitë dhe pastaj të bëjnë çfarë të duan”.
