Pas tensioneve në seancën plenare të 29 tetorit, deputetët e Partisë Socialiste i kanë dërguar Sekretariatit për Procedurat, Votimet dhe Etikën dhe kryetarit të Kuvendit, Niko Peleshit, një kërkesë për masa disiplinore ndaj kryetarit të Partisë Demokratike, Sali Berisha, dhe gjashtë deputetëve të tjerë të opozitës. Në dokument pretendohet se deputetët e PD-së penguan nisjen dhe zhvillimin normal të punimeve parlamentare, duke bllokuar foltoren dhe krijuar tensione gjatë seancës.
Në kërkesë thuhet se gjatë fjalës së tij në Kuvend, Sali Berisha përdori gjuhë joparlamentare dhe nxitëse të dhunës, duke deklaruar se “plumbat e gomës dhe gazi lotsjellës që përdoren gjatë protestave duhet t’u hidhen deputetëve të Partisë Socialiste”. Kërkuesit vlerësojnë se këto deklarata përbëjnë shkelje të Kodit të Sjelljes së Deputetit dhe të Rregullores së Kuvendit.
Dokumenti përmend gjithashtu sjellje të tjera gjatë votimit të çështjeve të rendit të ditës: sipas pretendimeve, deputetët Bledion Nallbati, Ivi Kaso, Blendi Himçi dhe Xhelal Mziu përdorën lëndë ose mjete piroteknike, ndërsa Blendi Himçi, Albana Vokshi dhe Klodiana Çapja hodhën sende të forta në drejtim të drejtuesit të seancës dhe anëtarëve të Këshillit të Ministrave. Kërkesa gjithashtu liston bllokimin e foltores, zhurmën e vazhdueshme dhe përdorimin e mjeteve fryrëse nga deputetë të tjerë të opozitës, veprime që, sipas palës kërkuese, penguan zhvillimin e rregullt të procedurave parlamentare.
Si bazë ligjore për masat e propozuara përmenden nenet 63 dhe 65/1 të Rregullores së Kuvendit dhe neni 6 i Kodit të Sjelljes së Deputetit. Masat disiplinore të propozuara në kërkesë janë: përjashtim për 10 ditë për Sali Berishën, dhe përjashtim për 60 ditë për secilin nga gjashtë deputetët e tjerë: Bledion Nallbati, Ivi Kaso, Blendi Himçi, Xhelal Mziu, Albana Vokshi dhe Klodiana Çapja. Masa ndaj Berishës lidhet me gjuhën e përdorur gjatë seancës, ndërsa për gjashtë të tjerët kërkohet përjashtim për veprimet që u atribuohen në dokument.
