Një tjetër aferë korruptive mban vulën e Bashkisë Poliçan dhe të kryetarit Adriatik Zotkaj. Tenderi me objekt “Kanali ujitës Mbrakull Stacioni nr.2-Varreza, Bashkia Poliçan” me një fond limit prej 32.8 milionë lekësh të reja ose 328 milion lek të vjetra është zhvilluar me një konkurrent të vetëm, kompaninë ARDMIR, e cila është shpallur fituese pa asnjë konkurrencë reale.
Ky është një shkelje e pastër në prokurimet publike. Ligji shqiptar e lejon zhvillimin e një procedure të tillë, por kur një bashki shpall tender me vetëm një operator në garë, dyshimi për klientelizëm dhe paracaktim të fituesit është i pashmangshëm. Në praktikë, këto tendera janë skema të zakonshme për të favorizuar kompanitë e afërta me pushtetin vendor, duke manipuluar kriteret dhe afatet e dorëzimit të dokumenteve që nga fillimi i procedurës.
Nga dokumentet rezulton se fondi limit ishte 32 856 752 lekë, ndërsa kompania fituese ka marrë kontratën për 31 823 767 lekë pa TVSH, pra një ulje fare të vogël, që tregon qartë mungesën e garës dhe faktin se gjithçka ishte e paracaktuar. Me TVSH, shuma e kontraktuar arrin në 38 188 521 lekë – para publike që do të derdhen në xhepat e një kompanie të vetme, nën bekimin e Adriatik Zotkajt.
Pyetja që lind është: Pse Bashkia Poliçan nuk siguroi garë reale? Pse kriteret ishin të tilla që përjashtuan çdo konkurrent tjetër? A është ky një investim i vërtetë për qytetarët apo një kontratë klienteliste për të pasuruar të afërm të pushtetit lokal?
Ligji “Për Prokurimet Publike” (nr. 162/2020) kërkon transparencë, konkurrencë dhe barazi mes operatorëve ekonomikë. Në këtë rast, Bashkia Poliçan dhe kryetari Adriatik Zotkaj kanë shkelur frymën e ligjit duke e kthyer një investim për komunitetin në një aferë të pastër abuzimi.
Kjo nuk është hera e parë që tenderat në Poliçan zhvillohen në këtë formë. Por sot qytetarët e Poliçanit kanë të drejtë të pyesin: për kë punohet – për njerëzit apo për xhepat e Zotkajt dhe klientëve të tij?
Kjo çështje është një tjetër dosje që SPAK duhet ta hetojë, sepse shënjon qartë elementë të korrupsionit aktiv dhe shpërdorimit të detyrës.
