Gjatë valës së të nxehtit të muajit qershor, Franca regjistroi 5,764 vdekje më shumë se niveli i pritshëm, shifra më e lartë që nga vala historike e vitit 2003, sipas të dhënave paraprake të publikuara nga Santé publique France. Nga 17 qershori deri më 2 korrik, pothuajse gjysma e këtyre vdekjeve u regjistruan vetëm në periudhën 25–27 qershor. Autoritetet nënvizojnë se këto janë vdekje nga të gjitha shkaqet dhe ende nuk mund t’i atribuohen drejtpërdrejt temperaturave të larta, megjithëse ndikimi i valës së të nxehtit konsiderohet i jashtëzakonshëm.
Vdekshmëria e tepërt u konstatuan në të gjitha grupmoshat mbi 15 vjeç, me ndikimin më të madh tek personat mbi 45 vjeç. Nga 5,764 vdekje shtesë, 3,719 i përkasin personave 75 vjeç e lart, duke konfirmuar se të moshuarit mbeten grupi më i rrezikuar. Në grupmoshën 45–64 vjeç u regjistruan 979 vdekje shtesë, ose 55% më shumë se niveli i pritshëm.
Sipas raportit, 98.5% e popullsisë franceze u prek nga temperaturat ekstreme, ndërsa vala e të nxehtit përfshiu 92 rajone administrative. Situata më e rëndë u regjistrua në rajonin e Parisit (Île-de-France), ku u raportuan 1,999 vdekje shtesë, gati dyfish i nivelit normal.
Shifrat paraprake kanë nxitur debat politik: opozita akuzon qeverinë për mungesë përgatitjeje për përballimin e temperaturave ekstreme, ndërsa autoritetet shëndetësore theksojnë se vala e këtij viti ishte e pazakontë për shkak të fillimit të hershëm, kohëzgjatjes dhe shtrirjes së saj në pothuajse të gjithë territorin francez. Ekspertët paralajmërojnë se ekspozimi i zgjatur ndaj temperaturave të larta rrit ndjeshëm rrezikun për grupet më të cenueshme, si të moshuarit, fëmijët dhe personat me sëmundje kronike.
Të dhënat janë paraprake dhe autoritetet nuk i kanë lidhur ende në mënyrë definitive me temperaturat, por evidentojnë një rritje të rëndë të vdekshmërisë gjatë periudhës së përmendur.
