Një person ka humbur jetën dhe katër të tjerë janë plagosur pas një sulmi me armë zjarri në zonën Logan Circle të Washington DC, më pak se një milje larg Shtëpisë së Bardhë. Lajmin e konfirmuan autoritetet në një konferencë për shtyp; shefi i përkohshëm i Policisë së Washingtonit, Jeffrey W. Carroll, bëri të ditur se një nga viktimat ndërroi jetë në vendngjarje.
Katër të plagosurit u transportuan në spital; njëri ndodhet në gjendje kritike, ndërsa tre të tjerët kanë plagë që, sipas informacioneve paraprake, nuk paraqesin rrezik për jetën. Policia tha se ngjarja u raportua pak para orës 08:00 me orën lokale dhe forcat e rendit arritën në vendbrendasi brenda 30 sekondave nga marrja e njoftimit.
Të shtënat ndodhën brenda dhe jashtë qendrës së fitnesit Vida Fitness në Logan Circle. Dëshmitarët përshkruan momentet e panikut; disa thanë se fillimisht menduan se zhurma vinte nga një objekt që kishte rënë ose nga një top ushtrimesh që kishte shpërthyer. Pas të shtënave, autori dyshohet se është barrikaduar brenda një ndërtese në bllokun 1500 të rrugës 15th Street NW, çka shkaktoi një situatë emergjente dhe mobilizimin e forcave të shumta policore.
Në vendngjarje kanë shkuar dhjetra automjete emergjence dhe efektivë nga disa agjenci ligjzbatuese, përfshirë FBI-në dhe Shërbimin e Sigurisë Kombëtare (HSI). Autoritetet kanë bllokuar disa blloqe përreth dhe u kanë bërë thirrje qytetarëve të shmangin zonën dhe të qëndrojnë larg vendngjarjes.
Deri tani identiteti i autorit dhe motivet e sulmit nuk janë bërë të ditura, dhe autoritetet nuk kanë dhënë ende detaje të plota mbi rrethanat që çuan në ngjarje. Policia po vijon hetimet për zbardhjen e plotë të ngjarjes.
