Një grup rreth 12 të rinjsh me motorë rrethoi në Nju Jork një automjet dhe nisi ta godasë me grushte e shkelma, ndërsa shoferi ishte i bllokuar në semafor. Disa nga të rinjtë mbanin maska në fytyrë. Ata rrethuan një Honda CR‑V të bardhë dhe e goditën vazhdimisht, ndërsa shoferët e mjeteve të tjera ndiqnin skenën të shqetësuar.
Kur semafori u ndez jeshil, shoferi tentoi të largohej dhe i kaloi sipër një motori blu që një nga të rinjtë kishte vendosur përpara makinës për të bllokuar rrugën. Grupi më pas ndjeki makinën, ndërsa personi që filmonte dëgjohet duke bërtitur “Hanky u godit!”.
Deri më tani nuk ka raportime për arrestime. Policia e Nju Jorkut paralajmëroi se personat e përfshirë do të identifikohen dhe do të përballen me përgjegjësinë ligjore. “Ne e dimë kush jeni dhe shumë shpejt do të trokasim në dyert tuaja”, deklaroi ndihmësshefi i policisë në Staten Island, John Buttacavoli, gjatë një konference. Prokurori i Staten Island, Michael McMahon, i quajti të rinjtë “terroristë adoleshentë”, duke kritikuar sjelljen e tyre ndaj drejtuesve të automjeteve që qarkullojnë normalisht në rrugë.
Banorët e zonës raportojnë se raste të tilla me grupe të rinjsh që lëvizin në mënyrë të rrezikshme me motorë dhe mjete të tjera janë shtuar gjatë vitit të fundit. Në përgjigje të kësaj shqetësimi, deputeti i Asamblesë së Nju Jorkut, Mike Reilly, njoftoi se në janar synon të paraqesë një projektligj që do t’i bëjë prindërit përgjegjës civilisht për sjelljen e rrezikshme të fëmijëve të mitur me biçikleta elektrike, motorë dhe mjete të tjera.
