Qytetarët shqiptarë janë tani në gjendje të paguajnë taksat për automjetet e tyre nëpërmjet portalit qeveritar e-Albania, pa nevojën për të vizituar sportelet. Ky shërbim i ri, i mundësuar nga Drejtoria e Përgjithshme të Shërbimeve të Transportit Rrugor (DPSHTRR) në bashkëpunim me Agjencinë Kombëtare të Shoqërisë së Informacionit (AKSHI), synon të lehtësojë procesin për më shumë se një milion përdorues.
Përmes aplikacionit, qytetarët mund të regjistrohen dhe të paguajnë detyrimet për mjetet e tyre në kohë reale. Endri Haxhiu, drejtor i DPSHTRR, thekson se “siguria është maksimale”, duke i siguruar qytetarët se të gjithë aktorët dhe bankat e nivelit të dytë janë të certifikuara për sigurinë kibernetike dhe fizike. Në momentin e pagesës, qytetarët marrin një njoftim të menjëhershëm.
Sipas të dhënave zyrtare, rreth 1.057.000 qytetarë do të përfitojnë nga ky shërbim. Po ashtu, ata do të marrin njoftime për skadimin e patentës ose të certifikatës së kontrollit teknik. Endri Haxhiu njoftoi se ky është vetëm fillimi, me plane për të avancuar më tej shërbimet digjitale të transportit, në mënyrë që të rrisin transparencën dhe të lehtësojnë jetën e qytetarëve.
Ky shërbim pritet gjithashtu të sjellë kursime të konsiderueshme në kohë, duke shmangur ditët e punës dhe kilometrat e udhëtimit për të kryer pagesat, me një vlerë që arrin deri në 57.9 milionë lekë. Kjo iniciativë është një hap përpara në digjitalizimin e shërbimeve publike dhe rritjen e efikasitetit në administratën shtetërore, duke përmirësuar kështu përvojën e qytetarëve në marrëdhënien e tyre me institucionet.
