Mësohen detaje nga takimi i kryeministrit Edi Rama me deputetët dhe drejtuesit e njësive organizative të Partisë Socialiste të Qarkut Tiranë. Ministri i Drejtësisë dhe deputet i kryeqytetit, Toni Gogu, njoftoi se “Tirana do të ketë Orën e Dëgjesës”, një kohë të posaçme dhe të rregullt kur deputetët dhe drejtuesit politikë do të jenë në dispozicion të qytetarëve: për t’i dëgjuar, për të marrë përsipër çështjet e tyre dhe për t’u kthyer me përgjigje.
Në takim u bë zbërthimi i detajuar i konceptit “Prania Besnike”. Sipas Gogu, prania nuk matet me sa takime bëjmë, por me sa njerëz dëgjojmë dhe sa çështje çojmë deri në fund. Kjo përkufizohet si BESA: kush troket, dëgjohet; çfarë merret përsipër, ndiqet; çdo qytetar merr përgjigje.
Kryeministri Rama e vlerësoi takimin si të dobishëm për organizimin e “Pranisë Besnike”, për metodologjinë e BESËS dhe për sistemin e ri “PasqyrAlbania”, duke e konsideruar këtë një hap të nevojshëm në përgatitjen e sezonit të ri politik të Partisë Socialiste. Ndërkohë, drejtuesit politikë të PS-së kanë nisur në qarqe shpjegimin dhe vënien në zbatim të “Pranisë Besnike”.
U shpërnda një dokument i unifikuar për drejtuesit se si të prezantojnë këtë nismë të kryeministrit, e cila u anonçua në fund të korrikut. Dokumenti i kushton një seksion të veçantë komunikimit publik, ku theksohet se “nuk është sfidë vetëm beteja për faktet, por lufta për perceptimin e realitetit”. Në udhëzime thuhet se komunikimi i drejtuesve politikë duhet të jetë sqarues, duke pasur parasysh që një manipulim mund të ushqehet nga një pakënaqësi e vërtetë; një ndjenjë mund të kthehet në fakt nga përsëritja; dhe një pakicë e zhurmshme mund të duket si shumicë.
Lajmi publikohet nga Top Channel.
