Gjatë një takimi me përfaqësues të agroturizmit, kryeministri Edi Rama kritkoi investitorët në tregun e shërbimeve, duke u ndalur veçanërisht tek bizneset që merren me mikpritjen e vizitorëve dhe turistëve. Ai vuri në dukje se vendosja e çmimeve të larta largon klientët dhe kundërshton modelin e një turizmi të mbingarkuar nga masa e turistëve, që sjell shumë njerëz por jo konsumatorë të lartë. “Ne duhet të synojmë ato që konsumojnë shumë. Agroturizmat mund të bëhen transformuesit në këtë drejtim, duke prodhuar, duke mbajtur çmimet e ulëta,” tha Rama.
Kryeministri argumentoi se, në shumë pika të vendit, shihet një kontrast mes nivelit të investimit dhe çmimeve të larta, çka sipas tij prish perspektivën afatgjatë të biznesit: “I ndërpret të ardhmen duke bërë lista, menu-ra, tabelën e çmimeve të dhomave me atë urinë për të fituar sot edhe atë që do të fitosh nesër, fatkeqësisht ti bën varrmihësin e investimin tënd. Ka ndodhur jo në pak vende.” Rama përdori edhe një imazh për të ilustruar sjelljen e investitorëve që synojnë përfitime të shpejta: “Nëse ti investon në një restorant me kashtë dhe nuk e ke problem atë që ke investuar, thua të përfitosh sot.”
Ai gjithashtu theksoi se investimet në hotele dhe agroturizma kërkojnë shuma të konsiderueshme parash në fazën fillestare dhe kanë një ritëm kthimi të ngadaltë, por të qëndrueshëm. “Dhjetëra miliona euro për hotele, agroturizma dhe je i vetëdijshëm që këto investime duan shumë para në fillim, por kthimin e kanë të ngadaltë por të qëndrueshëm, duhet ta mendosh që të fitosh mbi atë që ke ndërtuar hap pas hapi,” tha Rama, duke nënvizuar nevojën për një qasje të kujdesshme dhe të planifikuar ndaj çmimeve dhe fitimit. (Top Channel)
