Tre persona u plagosën të shtunën pas një sulmi me thikë në një kolegj të arsimit të lartë në Varshavë. Autoritetet thanë se autori i dyshuar është një student 21-vjeçar, ndërsa viktimat janë dy vajza 17-vjeçare dhe një grua 24-vjeçare. Ngjarja u raportua rreth orës 12:30, kur policia mori njoftimin për përdorim të një arme të rrezikshme.
Zëdhënësi i policisë, Jakub Filipiak, bëri të ditur se një nga të plagosurit u dërgua në spital me lëndime që nuk rrezikonin jetën, ndërsa dy personat e tjerë nuk kishin nevojë për trajtim spitalor. Sipas agjencisë shtetërore të lajmeve PAP, dy vajzat dhe gruaja kishin shkuar në kolegj për të dorëzuar dokumentet e regjistrimit. Raportohet se sulmuesi dhe të plagosurit nuk njiheshin më parë.
Sulmi në Varshavë është i treti i raportuar brenda pak ditësh në Poloni. Të enjten, një ish-nxënës 15-vjeçar vrau një punonjës pastrimi dhe plagosi dy mësues në një shkollë fillore në Leszczydol-Nowiny, në verilindje të Varshavës. Të mërkurën, një 19-vjeçar plagosi dhjetë persona, përfshirë veten, në një shkollë në Ostrołęka, në veri të kryeqytetit.
Pas këtyre incidenteve, autoritetet polake shtuan masat e sigurisë në institucionet arsimore. Sipas Reuters, mijëra efektivë policie vizituan shkolla në të gjithë vendin të premten, më 9 tetor, me qëllim qetësimin e nxënësve dhe stafit arsimor dhe adresimin e shqetësimeve për sulme të tjera të mundshme.
Ngjarjet kanë nxitur reagime të shpejta të forcave të rendit dhe masa të shtuar preventi- ve në institucionet arsimore, ndërsa hetimet për rastin në kolegjin e Varshavës vazhdojnë dhe nuk është bërë i ditur më shumë detaje lidhur me motivin e sulmuesit.
