Një seri shpërthimesh u dëgjuan pak pas mesnatës në Kiev, pasi Forcat Ajrore të Ukrainës paralajmëruan se raketa ruse po i afroheshin kryeqytetit. Sistemet e mbrojtjes ajrore u aktivizuan menjëherë dhe zjarre shpërthyen në disa zona të qytetit. Kryetari i Bashkisë së Kievit, Vitali Klitschko, njoftoi se mbrojtja ajrore ishte vënë në veprim pas sulmit me raketa balistike. Autoritetet thanë se zjarre shpërthyen në tre pika të ndryshme në lagjen Holosiivskyi, në jug të Kievit, ndërsa nuk pati raportime për persona të lënduar në kryeqytet. Sirenat e alarmit ajror u dëgjuan për rreth 50 minuta dhe banorët raportuan të paktën gjashtë shpërthime gjatë sulmit.
Paralelisht, sulme me dronë u regjistruan edhe në Zaporizhia dhe pranë Kharkivit. Shërbimet e emergjencës thanë se në Zaporizhia 11 persona u plagosën nga sulmet me dronë rusë, ndërsa gjashtë të tjerë u plagosën pranë Kharkivit, duke e çuar numrin e të plagosurve në të paktën 17 në këto incidente.
Sulmi erdhi disa orë pasi liderët e ashtuquajturit “Koalicion i të Gatshmëve”, aleatë të Ukrainës, u mblodhën në Paris për të diskutuar rritjen e ndihmës ushtarake për Kievin dhe për të shtuar presionin ndaj Rusisë. Gjatë takimit, nëntë vende evropiane njoftuan krijimin e një aleance me karakter mbrojtës për zhvillimin e kapaciteteve antibalistike në Evropë. Presidenti ukrainas Volodymyr Zelensky e përshkroi samitin si “një ditë historike për të gjithë ne” dhe kërkoi nga partnerët më shumë sisteme të mbrojtjes ajrore, duke theksuar mungesën e municioneve për sistemet amerikane Patriot.
Që nga muaji qershor, Rusia ka intensifikuar sulmet ndaj Kievit, duke përdorur një numër më të madh raketash balistike, të cilat autoritetet bëjnë me dije se janë më të shpejta dhe më të vështira për t’u interceptuar sesa raketat kruz. Një nga sulmet më të rënda u regjistrua natën e 1–2 korrikut, kur bombardimet ruse lanë të paktën 30 viktima, ngjarje që autoritetet ukrainase e përshkruan si një nga goditjet më të ashpra ndaj kryeqytetit që nga fillimi i luftës.
