Suedia sekuestruar anijen Jin Hui, që dyshohet të jetë pjesë e ashtuquajturës “flotë fantazmë” ruse, pasi u zbulua duke lundruar nën një flamur të rremë sirian. Roja Bregdetare suedeze dhe forcat e policisë hipën në tankerin e naftës të dielën në ujërat pranë ngushticës që lidh Detin Baltik me Detin e Veriut. Anija, 182 metra e gjatë dhe me flamur sirian, ishte nën mbikëqyrje disa ditë nga autoritetet suedeze, të cilat e identifikuan si pjesë të një rrjeti anijesh të përdorura nga Rusia për të eksportuar naftë bruto duke anashkaluar sanksionet e vendosura pas pushtimit të Ukrainës.
Sipas Rojës Bregdetare, operacioni u zhvillua në mesditë dhe anija dyshohet se po lundronte bosh drejt Detit Baltik. Autoritetet theksuan se Jin Hui figuron në lista të ndryshme ndërkombëtare sanksionesh, përfshirë ato të Bashkimit Evropian dhe Mbretërisë së Bashkuar, dhe ka indicie se flamuri i saj sirian është i rremë. Ministri suedez i Mbrojtjes Civile deklaroi në rrjetin social X se bëhet fjalë për “një tjetër anije që dyshohet se i përket flotës fantazmë ruse”.
Teknika e ashtuquajturës “flotë fantazmë” përfshin qindra anije cisternash nafte të vjetra, me pronësi dhe sigurim të paqartë, që nuk njihen nga tregjet perëndimore. Sipas materialit, Rusia ka ndërtuar këtë rrjet pas vendosjes së sanksioneve perëndimore ndaj eksporteve të energjisë pas pushtimit të Ukrainës në shkurt 2022. Anijet në këtë rrjet shpesh operojnë nën flamuj komoditeti, ndryshojnë emra dhe çaktivizojnë sistemet e gjurmimit për të shmangur kontrollin. Intervenimi i Suedisë është i pesta i këtij lloji dhe i treti që lidhet posaçërisht me çështjet e lundrimit, që tregon një vijim të kontrolleve ndaj anijeve që dyshohet se përdoren për të anashkaluar sanksionet. Top Channel.
