735 pedagogë kanë firmosur një deklaratë me pesë pika, të inicuar nga Forumi për Dialog Politik, ku kërkojnë dorëheqjen e kryeministrit Edi Rama, krijimin e një qeverie kujdestare dhe ndalimin e asaj që e cilësojnë si dhunë ndaj studentëve gjatë protestave. Mes firmëtarëve përmenden emra të njohur të botës akademike e publike: Stefan Çapaliku, Fatos Tarifa, Zyhdi Teqja, Andri Koxhaj, Petraq Milo, Gjok Vuksani, Fatos Qerimaj, Gentian Stroni, Enkeleda Olldashi, Kozeta Bakiu, Suzana Guxholli, Areti Stringa, Voltana Ademi, Enida Bozhegu, Lutfi Dervishi, Ardian Ndreca dhe Arbër Rendi, anëtar i Senatit Akademik.
Në deklaratë pedagogët shprehin se janë “të tronditur nga dhuna e pajustifikuar e ushtruar ndaj studentëve” dhe nga ato që i konsiderojnë shkelje të të drejtave të njeriut gjatë protestës. Në pikën e parë, ata i bëjnë thirrje kryeministrit Edi Rama që të dëgjojë kërkesat e studentëve dhe “t’i hapë rrugë paqëtimit të vendit”. Pedagogët kërkojnë dorëheqjen e tij dhe krijimin e një qeverie kujdestare, që sipas deklaratës duhet të sigurojë stabilitet institucional, qetësimin e situatës dhe respektimin e vullnetit të qytetarëve.
Pika e dytë i drejtohet Policisë dhe aktorëve të tjerë të ruajtjes së rendit, të cilëve u kërkohet të ndalojnë çdo akt dhune ndaj studentëve dhe të refuzojnë zbatimin e urdhrave që firmëtarët i konsiderojnë të paligjshëm. Pika e tretë u drejtohet përfaqësive diplomatike në Tiranë, me kërkesën që të ndërhyjnë publikisht për respektimin e të drejtave të qytetarëve.
Në pikën e katërt, firmëtarët i bëjnë thirrje protestuesve të mbrojnë bizneset dhe pronën publike e private, për të hequr çdo justifikim për ushtrimin e dhunës dhe delegjitimimin e protestës. Pika e pestë është thirrje për qytetarët e Tiranës që, “njësoj si në 1991”, t’u bashkohen studentëve për të pamundësuar dhunën ndaj tyre.
Deklarata përfundon me thënien: “Nëse ne jemi liderë në auditorët e universiteteve, sot studentët janë liderë tanë në shesh. Bashkohuni me ne për t’i mbrojtur nga dhuna.”
