Gjatë raportimit të arritjeve të vitit të kaluar dhe sfidat e objektivat që i ka vendosur Ministrisë së Bujqësisë për këtë vit, ministrja Frida Krifca foli edhe me shifra.
Krifca tha se në 12 muajt e 2022 bujqësia njohu rritje, si në vlerën e eksporteve, ashtu edhe në sasinë e tyre. Për vlerën, ministrja përmendi shifër mbi gjysmë miliardi euro, ndërsa për sasinë tha se bujqësia u rrit me 15.6 për qind.
Ministrja nuk shtjelloi në zëra se cilët sektorë të bujqësisë ishin rritur dhe me sa ishin rritur. Por, nëse shifrat e dhënë për rritjen e eksporteve në vlerë mund të jenë të besueshme për shkak të rritjes së përgjithshme të çmimeve, shifra e dhënë nga Krifca për sasinë nuk mbështetet nga të dhënat zyrtare të INSTAT.
Bujqësia jo vetëm që nuk u rrit në nëntëmujorin e parë të vitit të kaluar, por u tkurr lehtë. Sipas të dhënave të INSTAT, deri në shtator të 2022-it, bujqësia ishte i vetmi sektor me rënia, edhe pse e gjithë pjesa tjetër e ekonomisë raportonte rritje, udhëhequr nga ndërtimi dhe turizmi.
Të dhënat e INSTAT në raportimet periodike tremujore të Prodhimit të Brendshëm Bruto tregojnë se bujqësia ra me 0.02 për qind në tremujorin e tretë të vitit të kaluar, ndërsa u rrit në shifra të papërfillshme prej 0.05 dhe 0.01 në dy tremujorët e parë të të njëjtit vit.
Statistikat për të gjithë vitin e kaluar nuk janë publikuar ende, por mjaftojnë të dhënat e nëntë muajve të parë të vitit të kaluar për të vendosur seriozisht në pikëpyetje pretendimet e ministres së Bujqësisë për rritje me mbi 15 për qind të sasisë së eksporteve bujqësore.
…vetëm nëse kjo rritje është regjistruar në tre muajt e fundit të vitit të kaluar.
E thënë më thjeshtë, ministren në këtë rast e tradhtojnë vetë shifrat e nxjerra nga institucioni i saj, duke pasur parasysh se INSTAT i harton raportet periodike bazuar në të dhënat që i dorëzon Ministria e Bujqësisë dhe drejtoritë e zyrat që ajo ka në varësi.
