Elisa Spiropali, përmes një postimi në rrjetet sociale, kritikon thellë strukturën e brendshme të Partisë Socialiste dhe funksionimin e institucioneve shtetërore. Ajo thotë se i është këshilluar të heshtë, por refuzon këtë këshillë dhe shpjegon se heshtja ka kontribuar në krijimin e një klime ku institucione publike janë zëvendësuar nga instrumente presioni. Sipas saj, problemi nuk është thjesht një individ apo një përplasje e vetme, por një model i instaluar gradualisht, rezultat i tolerimeve të vogla, heshtjeve të arsyetuara dhe ndërhyrjeve fillimisht të padëmshme që më pas bëhen vendimtare.
Spiropali shpjegon se disa ministra dhe agjenci nuk reagojnë më ndaj ligjit e detyrës, por ndaj urdhrave dhe klaneve; nuk i përgjigjen procedurës, por interesave personale. Si pasojë, vendimet nuk merren bashkarisht, por veç e pasoja është se institucionet funksionojnë si zgjatime të vullnetit të pak njerëzve. Ajo nënvizon se kur strukturat shtetërore të emëruara dhe kontrolluara nga e njëjta dorë, të paraprira nga portale të paguara me para të errëta, fillojnë të sulmojnë deri edhe familjarët dhe ngacmojnë në vendet e punës, atëherë kufijtë janë tejkaluar dhe nuk bëhet më fjalë për politikë.
Deputetja thekson se nuk ka asgjë për të fshehur dhe se sulmet nuk e trembin; ato e bëjnë më të qartë për çfarë duhet thënë dhe bërë. Ajo deklaron se ka refuzuar dhe refuzon modelin ku institucione publike me fytyrë personale përdoren si hanxharë për të frikësuar, ku mbajtja e ndikimit kërkon kontroll dhe jo performancë, dhe ku pjesa e ndershme e administratës detyrohet të zbatojë urdhra të paligjshëm për interesa e presione eprorësh.
Spiropali përshkruan edhe një deformim tjetër: një parti e gjallë po zëvendësohet nga një strukturë fosile ku gjithçka filtrohet përmes emërimeve okulte, “drejtorokracia” ka zëvendësuar politikën me administrim besnikërie. Ajo apelon që çështja të mos trajtohet si personale, por si mospajtim me një mënyrë funksionimi që po bëhet normë, duke paralajmëruar se nëse vazhdon, do të prodhojë largim dhe do të shkatërrojë llogaridhënien institucionale. Spiropali mbyll duke thënë se Partia Socialiste ka energjinë për përmirësime dhe transformim në dobi të Shqipërisë dhe shqiptarëve.
