Në ishullin Cheung Chau u zhvillua edhe këtë vit Festivali tradicional i Bukës, një ngjarje kulturore që tërheq mijëra vizitorë vendas dhe turistë. Pak pas mesnatës, me fishekzjarre, muzikë tradicionale dhe atmosferë festive, u zhvillua gara e ngjitjes në kullën e bukës. Me tingullin e gongut ceremonial, 12 garues morën pjesë në sfidën për t’u ngjitur në një kullë bambuje 14 metra të lartë, të mbuluar me rreth 9 mijë bukë tradicionale të bardha. Qëllimi ishte të mblidhnin sa më shumë bukë brenda pak minutash; ato në majë të kullës konsideroheshin më të vlefshmet dhe jepnin më shumë pikë. Gara kërkon shpejtësi, forcë fizike, ekuilibër dhe qëndrueshmëri.
Konkurrenti Kwok Chun-yin tha për Associated Press se pjesa më e vështirë është arritja në majë të kullës, ku harxhohet pothuajse e gjithë energjia, dhe e përshkroi garën si intensive dhe si një nder për ata që mbajnë gjallë traditën shekullore. Gjatë festivalit, rrugët e ishullit u mbushën me vizitorë që prisnin në radhë pranë furrave tradicionale për të blerë bukët simbolike. Vizitori Gordon Chow nga Makao vlerësoi rëndësinë e ruajtjes së traditës, duke thënë se ajo përfaqëson paqen dhe sigurinë për komunitetin.
Festivali Cheung Chau Bun ka rreth 100 vjet histori dhe lidhet me një epidemi vdekjeprurëse që goditi ishullin; sipas besimit tradicional taoist, banorët filluan t’u ofronin perëndive bukë të bardha me avull për të larguar shpirtrat e këqij dhe për të rikthyer paqen dhe sigurinë. Bukët tradicionale, të njohura në kantonezisht si “Ping On Bao” — që do të thotë “bukë paqeje dhe sigurie” — vazhdojnë të simbolizojnë fat, mbrojtje dhe harmoni për banorët.
Festivali ka kaluar periudha të vështira: gara u pezullua për dekada pas një aksidenti në 1978, kur kullat e bambusë u shembën dhe plagosën dhjetëra persona; u rikthye në 2005 me masa më të rrepta sigurie dhe u ndërpre gjatë pandemisë së Covid-19. Këtë vit festivali rikthehet plotësisht në formatin tradicional, rikthyer atmosferën festive në Cheung Chau.
