Kryeministri spanjoll, Pedro Sanchez, njoftoi se Këshilli i Ministrave do të miratojë një dekret Mbretëror për të nisur një proces të jashtëzakonshëm sistemimi për rreth gjysmë milioni migrantë në Spanjë. Sanchez e përshkroi këtë iniciativë si një hap drejt normalizimit dhe drejtësisë, duke theksuar rëndësinë e pranisë së emigrantëve për ekonominë spanjolle, veçanërisht përballë sfidave të plakjes së popullsisë dhe nevojës për forcë punëtore.
Ai theksoi se integrimi i mirë dhe shfrytëzimi i potencialit të plotë të emigrantëve janë të domosdoshme për të ardhmen e vendit. Sanchez vuri në dukje se të drejtat e emigrantëve duhet të shoqërohen me detyrime dhe kontribut të barabartë në shoqëri. Ai pranoi se emigracioni sjell sfida, por sipas tij, ato zgjidhen më mirë përmes legalizimit dhe menaxhimit të përgjegjshëm.
Kryeministri theksoi se Spanja ka dy mundësi: të mbjellë frikë dhe të dënojë migrantët ose të menaxhojë emigrimin me përgjegjësi për të krijuar prosperitet të përbashkët. Ai konfirmoi se vendi do të vazhdojë të zgjedhë rrugën e dytë.
