Trajneri i kombëtares spanjolle, Luis de la Fuente, njoftoi se Lamine Yamal dhe Nico Williams pritet të jenë të disponueshëm për ndeshjen e parë të Spanjës në Kupën e Botës 2026 kundër Cape Verde. Ai tha se edhe Victor Munoz po ecën mirë me rikuperimin dhe se të tre lojtarët po respektojnë afatet e rikuperimit.
Në konferencën për shtyp të mbajtur në Puebla, De la Fuente theksoi se gjendja e Yamal, Williams dhe Munoz është shumë e mirë. “Besoj se të tre do të jenë të gatshëm për ndeshjen e ardhshme. Nëse nuk ka komplikacione gjatë ditëve në vijim, llogarisim që më 15 qershor të jenë në dispozicion të skuadrës”, u shpreh tekniku spanjoll.
Megjithatë, trajneri pranoi se është ende e vështirë të përcaktohet nëse dy sulmuesit do ta fillojnë ndeshjen si titullarë. “Që të jenë në formacionin startues është më e komplikuar. Por mendoj se do të jenë të gatshëm për të luajtur. Nuk e dimë ende sa minuta do të mund të aktivizohen”, shtoi ai, duke e lënë të hapur vendimin për minutazhin dhe vendin në formacion.
Yamal dhe Williams vijojnë rikuperimin nga dëmtimet muskulore dhe kanë nisur gradualisht stërvitjen me grupin në kampin stërvitor të Spanjës në Chattanooga, ku po punojnë nën mbikëqyrjen e stafit mjekësor dhe teknik për t’u rikthyer në gjendje loje.
Skuadra spanjolle ndodhet aktualisht në Meksikë për të zhvilluar ndeshjen e fundit miqësore përgatitore ndaj Perusë, si hap përgatitor për debutimin në Botëror. Përballja e parë e Spanjës në Kupën e Botës 2026 është planifikuar më 15 qershor në Atlanta kundër Kepit të Gjelbër.
