Pishina “infinity” me pamje nga deti, hidromasazh i konceptuar sipas një hoteli në Santorini, dru “teak” për një atmosferë “si në jaht”, palestër, sauna dhe banjo turke janë disa nga elementet e përshkruara për Vilën 188/1 në “Green Coast”, e identifikuar në komunikimet e administruara nga SPAK edhe si “Vila 2”. Prokuroria e Posaçme, sipas provave të dosjes hetimore, e atribuoi këtë pasuri faktike Belinda Ballukut.
Në një prej emaileve të administruara nga SPAK, arkitekti Alban Efthimiu i dërgon Ballukut në adresën e saj personale një variant të rishikuar të projektit dhe diskuton detaje të arredimit dhe luksit të vilës. Top Channel kërkoi një qëndrim nga Efthimiu; ai u përgjigj shkurt: “Përshëndetje! Më vjen keq, por jam i rezervuar gjithmonë. Me respekt.” Nga “Green Coast”, përmes Balfin Grup, nuk erdhi një përgjigje konkrete mbi identitetin e klientit, siç i referoheshin kompania ndërtuese dhe studioja Atellier 4 në emailet e dosjes së SPAK. Kompania deklaroi se nuk mund të komentojë mbi një çështje që është nën hetim dhe se ka vepruar në përputhje me kuadrin ligjor, duke njoftuar gatishmërinë për të bashkëpunuar me institucionet kompetente.
Në dokumentacionin e hetimit shfaqen komunikime që përmendin emrin e Ballukut. Për punimet e pishinës gjendet shënimi “PISHINA ARBER ABAZI (DHERMI) + BELINDA” me një vlerë prej 25,000 eurosh. SPAK vlerëson se këto të dhëna, bashkë me prova të tjera të administruara gjatë hetimit, mbështesin dyshimin se vila ka qenë pasuri faktike e Belinda Ballukut, ndërsa dokumentacioni i pronësisë ishte formalisht në emër të Igli Tares.
Më 9 shtator, Gjykata e Posaçme pranoi kërkesën e SPAK për vendosjen e sekuestros preventive mbi këtë pasuri. Megjithatë SPAK nuk ka marrë ende vendim nëse do të kërkojë nga Parlamenti autorizimin për një masë të re sigurimi ndaj ish-zëvendëskryeministres Balluku, pas shtimit të akuzës për korrupsion. Pas publikimit të fakteve të reja, kreu i grupit parlamentar të PD, Gazment Bardhi, akuzoi SPAK për standard të dyfishtë lidhur me marrjen e masave në raste të mëparshme dhe në këtë rast.
