Drejtuesi politik i Partisë Demokratike për Qarkun e Lezhës, Agron Gjekmarkaj, feston sot 51-vjetorin, por këtë herë në një atmosferë të pazakontë.
Ai po e kalon ditëlindjen në Parkun Olimpik, ku ndodhet për të ndjekur nga afër numërimin e votave të diasporës për qarkun Lezhë, një proces i rëndësishëm, pasi PD-ja rrezikonte të humbiste mandatin e katërt, i cili në fund u konfirmua.
Megjithatë, kjo ditë e veçantë nuk ka kaluar pa surpriza për Gjekmarkajn. Fillimisht, ai është uruar dhe surprizuar me tortë nga demokratët, dhe më pas edhe nga kampi kundërshtar, Partia Socialiste, që gjithashtu i solli një tortë.
Në njërën prej tortave shkruhej “Edhe 100, Agron”, ndërsa Gjekmarkaj, me humor, u shpreh: “Mos kini hedhur helm vallë?”
