Autoritetet greke besojnë se grupet shqiptare po pastrojnë paratë me prejardhje me krimi i organizuar, përmes lavazheve që kanë hapur në Athinë. ProNews raporton se sipas të dhënave të marra nga Policia Greke, AADE dhe Ministria e Financave, këto lavazhe shërbejnë si një mënyrë për të kanalizuar të ardhurat nga trafiku i drogës dhe prostitucioni.
Autoritetet kanë ngritur dyshime pasi biznese të tilla raportojnë se lajnë deri në 500 makina në ditë, një shifër kjo në dukje e pamundur.
Në një lavazh të zonës së Glyfadhës, pranë një restoranti luksoz, për shembull, raportohet se lahen më shumë se 300 makina.
Në të njëjtën zonë, një tjetër lavazh dyshohet se ka lidhje me grupe kriminale. Gjithashtu janë zbuluar edhe disa lavazhe të tjera në zonat e Pireut, Petrou Ralli, Mesogeia, Nikaia dhe Ilioupoli, ku të gjitha kanë pasur mbështetje nga autoritetet lokale për licencimin, pavarësisht mungesës së dokumenteve që justifikojnë investime të mëdha financiare.
Në disa raste, punëtorët shqiptarë të lavazheve janë zbuluar se bashkëpunojnë me banda të specializuara në vjedhje makinash, ku kopjojnë çelësat dhe më pas vjedhin automjetet. Ndërkohë, disa nga pronarët e vërtetë të këtyre lavazheve janë të dënuar shqiptarë që drejtojnë operacionet nga brenda burgut.
Hetimet po shtrihen gjithashtu në përfshirjen e drejtuesve të pushtetit lokal dhe të disa zyrtarëve të policisë.
