Një rast i rëndë abuzimi me pensionet është zbuluar në Shkodër, ku një postier ka mbajtur për dy muaj rresht pensionet e tre pensionistëve, duke i lënë ata pa asnjë mjet jetese. Ngjarja u bë publike pas ndërhyrjes së emisionit investigativ Fiks Fare, i cili zbuloj të vërtetën dhe detyroi përgjegjësin të pranojë abuzimin.
Qytetari Lin Zhuri denoncoi se prindërit e tij dhe nusja e xhaxhait nuk kishin marrë pensionet që nga muaji shkurt 2026. Ai tha se pensionet dorëzoheshin rregullisht nga postieri, por shpërndarja ishte ndërprerë pa shpjegim. Pas ankesave të bëra në postë, Lin Zhuri kërkoi që pensionet të vazhdonin si më parë.
Gazetarët e Fiks Fare iu drejtuan Postës së Shkodrës, ku u informuan se postieri nuk ndodhej aty. Pas pak minutash, ai u paraqit dhe kërkoi të fliste privatisht me qytetarin, duke premtuar se do t’i sillte të gjitha paratë brenda ditës dhe duke kërkuar që çështja të mos bëhej publike. Ai u justifikua për vonesën me probleme personale, ndërsa në sportel u përgatitën paratë për dorëzim.
Pas një telefonate nga drejtoresha e postës, ajo njoftoi se do të kryente verifikimet e nevojshme dhe se pensioni i muajit prill do të dorëzohej brenda ditës ose të nesërmen. Ajo tha se për muajt shkurt dhe mars, pagesat figuronin si tërhequra në sistem.
Pas largimit të gazetarëve, drejtoresha konfirmoi dorëzimin e pensionit të muajit prill, por insistoi se për dy muajt e tjerë, pagesat ishin tërhequr. Gjatë një ballafaqimi të organizuar nga Fiks Fare, postieri pranoi publikisht se kishte mbajtur për vete pensionet e tre të moshuarve për dy muaj dhe kërkoi falje.
Ky rast nxjerr në pah jo vetëm abuzimin individual, por edhe mungesën e reagimit nga institucionet përkatëse ndaj ankesave të qytetarëve. Ndërhyrja e Fiks Fare rezultoi vendimtare për zbulimin e së vërtetës dhe rikthimin e të drejtave të mohuara për tre pensionistët.
