Autoritetet greke zbuluan një skemë të madhe mashtrimi të ngritur përmes një organizate joqeveritare, ku anëtarët dyshohet se përvetësonin donacionet e qytetarëve të destinuara për trajtimin dhe mbështetjen financiare të fëmijëve me sëmundje të rënda, përfshirë kancerin. Sipas hetimeve të Policisë Greke, përfitimi i paligjshëm nga veprimtaria dyshohet të arrijë rreth 2.829.516 euro.
Në një operacion të gjerë policor të zhvilluar të premten, më 30 tetor 2026, në disa zona të Greqisë u arrestuan gjashtë persona, të cilët dyshohet se ishin pjesë e një organizate kriminale të strukturuar në dy grupe. Drejtoria për Luftën kundër Krimit të Organizuar në Greqinë e Veriut ndërmori hetimet pas një denoncimi lidhur me transparencën e funksionimit të shoqatës. Sipas autoriteteve, grupi i parë përbëhej nga tre persona — një 37-vjeçar, një 35-vjeçare dhe një 32-vjeçar — që dyshohet se kanë ngritur skemën që prej tetorit 2018, duke përdorur një shoqatë jofitimprurëse si mbulesë.
Nëpërmjet organizatës zhvilloheshin fushata bamirësie dhe kërkoheshin donacione për fëmijët me sëmundje të rënda ose me aftësi të kufizuara, por hetimet tregojnë se fushatat zhvilloheshin pa lejet e nevojshme ligjore dhe qëllimi i vërtetë i organizatës ndryshonte nga ai publik. Vetëm një pjesë e vogël e parave shkonte tek fëmijët përfitues, ndërsa pjesa më e madhe dyshohet se përvetësohej nga 37-vjeçari dhe 35-vjeçarja.
Hetimi zbuloi gjithashtu përdorimin e të ardhurave të paligjshme për financimin e klubeve sportive dhe manipulimin e rezultateve të ndeshjeve të futbollit. Sipas policisë, organizata ishte e ndarë në dy nëngrupe me veprimtari të ndryshme, por të lidhura përmes një anëtari të përbashkët, dhe një pjesë e parave dyshohet se përdorej për ryshfet dhe ndikim të paligjshëm në rezultatet sportive.
Gjatë operacionit u sekuestruan telefona celularë, kompjuterë, pajisje për ruajtjen e të dhënave dixhitale, çanta dhe portofola të markave luksoze, orë të firmave të njohura, si dhe 18.330 euro cash. Nga hetimi financiar dhe marrja në pyetje e prindërve të 34 fëmijëve përfitues u përcaktua dëm ekonomik i dyshuar rreth 2.829.516 euro. Gjashtë të arrestuarit përballen me akuza për pjesëmarrje në organizatë kriminale, mashtrim dhe përvetësim në shkallë të rëndë, pastrim parash dhe shkelje të legjislacionit për sportin, përfshirë ryshfetin për manipulim rezultatesh. Hetimet vazhdojnë për të zbardhur plotësisht përmasat e skemës dhe për të identifikuar të gjithë personat e përfshirë.
