Ndërsa sezoni i ri i NBA ka filluar, ligën e basketbollit amerikan e ka tronditur një skandal i madh jashtë parketit. Trajneri i Portland Trail Blazers, Chauncey Billups, dhe mbrojtësi i Miami Heat, Terry Rozier, janë arrestuar nga FBI për përfshirje në aktivitete të paligjshme të lojërave të fatit. Hetimi ka shpjerë në arrestimin e dhjetëra personave dhe përfshin të paktën tri familje mafioze.
Sipas mediave amerikane, Terry Rozier dyshohet se ka qenë pjesë e një rrjeti të paligjshëm bastesh sportive, ndërsa Billups po hetohet për lidhje me një operacion pokeri që dyshohet se ka lidhje me grupe kriminale. Drejtori i FBI, në konferencën për mediat, sqaroi se operacioni u zhvillua në 11 shtete dhe rezultoi me 30 arrestime. Dyshohet se Rozier dhe Billups kanë paracaktuar rezultate sportive në favor të mafiozëve për përfitime financiare.
Hetimi, i iniciuar në mars 2023, u fokusua fillimisht në një ndeshje mes Charlotte Hornets dhe New Orleans Pelicans, ku u vërejt një rritje të çuditshme të basteve për performancat e Rozier. Një bastvënës profesionist realizoi tridhjetë baste me shumën totale prej rreth 14,000 dollarësh. Pas rënies së dyshuar të Rozier nga loja për shkak të një dëmtimi, disa agjenci u detyruan të mbyllin bastet për të.
Ky incident ka ringjallur debatin rreth marrëdhënies mes sportit profesional dhe industrisë së basteve në SHBA. Hetimi federal mund të ketë pasoja të rënda jo vetëm për individët e përfshirë, por gjithashtu do të ndikojë mënyrën se si NBA dhe ligat e tjera do të monitorojnë lidhjet e sportistëve me bastet. Ky skandal përbën një nga ngjarjet më të rëndësishme që ka prekur NBA-në në dekadën e fundit, duke vënë në pikëpyetje transparencën dhe etikën e ligës një nga më të fuqishme në botë.
