TIRANË- Një ministër grek dhe tre zëvendësministra në Greqi kanë dorëzuar ditën e sotme dorëheqjen nga postet e tyre, pas një skandali me fondet e keqmenaxhuara të Bashkimit Europian për fermerët grekë, të trajtuara në 6 vitet e fundit si subvencione të paligjshme. Dorëheqja e tyre u pranua menjëherë nga kryeministri i Greqisë, Kyriakos Mitsotakis, ndërsa personat që do t’i zëvendësojnë do të bëhen të ditur në javën e ardhshme.
Kjo është procedura normale që ndiqet në një shtet demokratik, kur një politikan përfshihet në një skandal të tillë, aq më shumë kur nga ky skandal dëmtohen edhe fermerët e vendit.
Ndërkohë krejt e kundërta ndodh në një shtet që aspiron të bëhet pjesë e Bashkimit Europian. Në Shqipëri, ministrja e Bujqësisë pasi përfshihet në një skandal të tillë, rritet në detyrë duke u bërë këshilltare e vetë kryeministrit. Rasti në fjalë është ai i Frida Krifcës, e cila ka drejtuar edhe AZHBR dhe ministrinë e Bujqësisë, por nga insitucioni i fundit u largua, pasi në media u publikua skandali i shpërdorimit të fondeve të BE për bujqësinë.
Një vit më parë, Zyra e Bashkimit Evropian kundër Mashtrimeve, OLAF, njoftoi zyrtarisht se kishte identifikuar keqpërdorimin e 33 milionë eurove fonde të BE-së në ndihmë të bujqësisë shqiptare dhe rekomandoi bllokimin e paketës së radhës për sa kohë nuk ka masa për të garantuar mbrojtjen e interesave financiare të BE-së.
Skandali kishte të bënte me fondet që BE ka dhënë për zhvillimin bujqësor e rural të Shqipërisë përmes Instrumentit të Asistencës së Para-Anëtarësimit (IPARD II), dhe nisi pasi disa nga qytetarët shqiptarë që aplikuan për fonde, denoncuan zyrën shqiptare për praktika korruptive.
Sipas njoftimit për shtyp të OLAF, hetimi i tyre zbuloi se aplikuesve u kërkohej të paguanin një përqindje të lartë të grantit te kompani konsulence “të parapërzgjedhura” të cilat lehtësonin realizimin e kontratave me Agjencinë Shqiptare për Zhvillim Rural (ARDA), e cila shpërndante fondet.
OLAF i rekomandoi asokohet Komisionit Evropian që të shpallë thirrjet një dhe dy të programit IPARD II si të pavlefshme. Totali i fondeve të këtyre thirrjeve arrijnë në 33 milionë euro. OLAF rekomandoi gjithashtu që BE të ndalojë programin IPARD III me vlerë 112 milionë euro deri sa të merrenin masa për të mbrojtur interesat financiare të BE-së nga aktivitetet ilegale.
