Chelsea ka shmangur një zbritje pikësh në Premier League pas një apeli të zhvilluar larg syrit të publikut, por është gjobitur me 10 milionë paund nga Federata Angleze e Futbollit (FA) për shkelje lidhur me pagesa të paligjshme ndaj agjentëve gjatë periudhës së pronësisë së Roman Abramovich. Në shtator të vitit të kaluar klubi ishte akuzuar për 74 shkelje të rregullave të FA-së, që lidhen me pagesat ndaj agjentëve dhe marrëveshjet me palë të treta në transferime mes viteve 2009 dhe 2022.
Mes transferimeve të përfshira në hetim janë ato të Eden Hazard, Willian, Ramires, David Luiz dhe Samuel Eto’o. Chelsea pranoi fajësinë për të gjitha shkeljet, të cilat përfshinin 32 lojtarë dhe 18 të mitur, me pagesa të parregullta që arritën vlerën e 47 milionë paundëve. Fillimisht një komision i pavarur i FA-së vendosi një zbritje prej gjashtë pikësh, e cila ishte pezulluar deri në vitin 2027; pas apelimit të klubit, ajo masë u anulua dhe u zëvendësua me një ndalim të pezulluar për dy afate kalimtare, gjithashtu në fuqi deri më 30 qershor 2027.
Bordi i Apelit konkludoi se Chelsea nuk kishte përfituar avantazh sportiv nga shkeljet dhe se, nëse pagesat do të ishin raportuar në kohën e duhur, klubi nuk do të kishte shkelur rregullat financiare. Pronaret aktualë, Todd Boehly dhe Clearlake Capital, i vetëraportuan parregullsitë tek FA, UEFA dhe Premier League pas marrjes së klubit në 2022, pas një auditimi që zbuloi mangësi në raportimin financiar të periudhës së mëparshme.
FA vlerësoi bashkëpunimin e plotë të Chelsea gjatë hetimit, duke thënë se klubi dorëzoi mijëra dokumente dhe bashkëpunoi me autoritetet. Hetimet ndaj individëve të përfshirë vazhdojnë, megjithëse raportimet thonë se asnjë punonjës aktual i Chelsea nuk është nën hetim. Nuk është hera e parë që klubi ndëshkohet për këtë çështje: në 2023 Chelsea arriti një marrëveshje me UEFA-n, ndërsa më herët këtë vit u gjobit edhe nga Premier League me 10.75 milionë paund, së bashku me një ndalim të pezulluar për transferimet.
Në deklaratën zyrtare klubi tha se është i kënaqur që procesi me FA ka përfunduar dhe se me këtë vendim janë mbyllur të gjitha procedurat rregullatore që lidhen me çështjet historike të vetëraportuara. FA bëri të ditur se gjoba prej 10 milionë paundësh do të investohet në zhvillimin e futbollit bazë në Angli.
