Nadia Marcinko, ish-partnerja e financierit Jeffrey Epstein, po rikthehet në fokus pas dokumenteve dhe emaileve të reja që zbulojnë marrëdhënien e saj me të dhe mund ta përfshijnë në hetime të Kongresit amerikan mbi rrjetin e trafikimit seksual. E lindur në Sllovaki, Marcinko ishte për shtatë vjet partnerja e Epstein, pas Ghislaine Maxwell, dhe më vonë pilotoi avionin e tij privat. Ajo nuk është akuzuar apo dënuar ndonjëherë për vepra penale.
Sipas një hetimi të BBC-së, Marcinko ishte një nga katër gratë e përfshira në marrëveshjen e vitit 2008 që u garantonte imunitet si “bashkëpunëtore të mundshme” të Epstein. Dy prej tyre, Sarah Kellen dhe Lesley Groff, priten të merreshin në pyetje nga ligjvënësit amerikanë, ndërsa disa kongresmenë kërkojnë që edhe Marcinko të hetohet. Dokumentet dhe komunikimet tregojnë se Epstein dhe Marcinko planifikonin të krijonin familje së bashku dhe se ai i kërkonte shpesh të gjente gra të tjera për t’i kënaqur dëshirat e tij seksuale.
Një email i vitit 2006 tregon se Marcinko i shkruante Epstein se do të përpiqej të gjente vajza për të në Nju Jork, megjithëse shprehte shqetësim për marrëdhënien e tyre; megjithatë, nuk ka prova që ajo ka prezantuar vajza të mitura. Dokumentet po ashtu zbulojnë një aspekt kontrollues dhe abuziv të sjelljes së Epstein ndaj saj: Marcinko i ka thënë hetuesve federalë se ai ushtronte kontroll të plotë mbi jetën e saj, e ka detyruar të kryejë operacione plastike dhe ka përdorur dhunë fizike. Në një email të vitit 2012 ajo i shkruante Epstein: “Nuk dua të jem me ty, por më shqetëson të shoh se si manipulon dhe lëndon vajza të tjera”.
Pas arrestimit të dytë të Epstein në 2019 për trafikim seksual, Marcinko bashkëpunoi me FBI-në; agjencia më vonë mbështeti kërkesën e saj për të qëndruar në SHBA, duke e cilësuar si viktimë të një marrëdhënieje seksuale detyruese. Sipas raportimeve, ajo është larguar nga jeta publike dhe jeton në Nju Jork, ku është përfshirë në aktivitete të një qendre budiste Zen.
Rasti ka nxitur debat në SHBA mbi kufirin ndërmjet viktimës dhe bashkëpunëtores në rastet e trafikimit seksual; ekspertët ligjorë theksojnë se viktimat shpesh mbeten nën kontroll psikologjik të abuzuesve edhe pas largimit fizik. Kongresi pritet të vendosë nëse do ta thërrasë zyrtarisht Marcinko për të dëshmuar mbi rolin e saj në rrjetin e Epstein.
