Një ngjarje e pazakontë ka tronditur futbollin rumun, me protagonist 23-vjeçarin Octavian Popescu, i konsideruar dikur si e ardhmja e futbollit vendas. Sipas raportimeve të mediave rumune, incidenti ndodhi në fund të gushtit në apartamentin e tij, ku alarma u ngrit pasi futbollisti nuk iu përgjigj për disa ditë telefonatave të familjarëve dhe njerëzve të klubit. Policia dhe zjarrfikësit hynë me forcë në banesë pasi askush nuk hapi derën dhe, sipas “Golazo”, “Gazeta Sporturilor” dhe “ProSport”, Popescu u gjet brenda së bashku me një person tjetër. Mediat pretendojnë se në apartament kishte tullumbace dhe se mund të ishte përdorur oksid azoti, i njohur si “gazi i të qeshurës”.
Pas ndërhyrjes, futbollisti u dërgua për kontroll mjekësor dhe më pas në spitalin psikiatrik “Alexandru Obregia” në Bukuresht për vlerësim. FCSB nuk ka konfirmuar zyrtarisht detajet e incidentit. Drejtori sportiv Mihai Stoica i cilësoi raportimet si thashetheme dhe e përshkroi situatën si një çështje personale, pa lidhje me futbollin. Pronari i klubit, Gigi Becali, konfirmoi se Popescu ishte shoqëruar me njerëz që klubi i konsideronte si ndikim negativ dhe se kjo ishte një nga arsyet për vendimin për ta larguar përkohësisht nga ekipi.
Pak kohë më vonë, Popescu u huazua te skuadra greke Levadiakos, pa të drejtë blerjeje. Megjithatë, FCSB nuk hoqi dorë plotësisht prej tij dhe i zgjati kontratën. Mediat rumune shkruajnë gjithashtu se ky mund të mos jetë incidenti i parë i këtij lloji, por kjo pjesë mbetet e pakonfirmuar zyrtarisht.
Nga një prej talenteve më të mëdha të Rumanisë, Popescu po përballet me një periudhë të vështirë të karrierës. Huazimi në Greqi është parë si mundësi për ta lënë pas këtë histori dhe për të rikthyer vëmendjen te futbolli, aktiviteti ku ai shquhet. Top Channel.
