Qeveria ka parashikuar 15 mln euro për të përballuar kostot e zgjedhjeve të ardhshme vendore, një fond i pamjaftueshëm sipas KQZ për të futur votimin dhe numërimin elektronik në bashkitë e mëdha në vend.
Kërkesa e këtij institucioni për një shumë prej 37 mln euro është refuzuar nga Ministria e Financave, edhe pse kryekomisioner e ka edhe një mundësi të dytë për të marrë paratë e nevojshme, por fillimisht duhet të bindë PS për votimin elektronik.
Qeveria i ka thënë jo votimit elektronik edhe në 7 bashki të tjera për zgjedhjet e ardhshme vendore pasi Ministria e Financave ka parashikuar vetëm 15 milionë euro për të përballuar koston e lokaleve të vitit 2023.
Me këtë fond, sipas Komisionit mund të përballohet vetëm një proces tradicional, votim dhe numërim me fletë, pasi shpenzimet e shtuara për mirëmbajtjen e pajisjeve të identifikimit elektronik, kamerat e vendosura në çdo qendër votimi, materialet zgjedhore dhe paga për administratën nuk i japin mundëi kryekomisionerit për të manovruar elektronikisht.
Edhe pse Celibashi ka edhe një mundësi të dytë për t’i marrë paratë e kërkuara qeverisë, por fillimisht duhet të bindë PS që të pranojë votimin elektronik në 7 bashki. Në rast se kjo do të ndodhë, kryekomisioneri së bashku me deputetët e majtë dhe të djathtë do të mund ta bindin ministren e Financave në komisione kur të raportohet buxheti, që t’i japë KQZ pjesën tjetër të parave, dhe 22 mln euro të tjera./Oranews
