Zjarret e fuqishme pyjore kanë përfshirë zona të ndryshme të Spanjës, duke detyruar evakuimin e qindra banorëve dhe duke djegur mbi 4,000 hektarë sipërfaqe. Situata më e vështirë është në provincat Huelva dhe Castellón, ku zjarrfikësit dhe ekipet e emergjencave vazhdojnë luftën me flakët.
Në Niebla, perëndim i Seviljes, zjarri që shpërtheu të enjten detyroi evakuimin e disa qendrave të banuara, përfshirë Berrocal, El Membrillo, El Pozuelo dhe Marigenta. Sipas Shërbimit Andaluzian për Luftën ndaj Zjarreve Pyjore (INFOCA), rreth 400 persona janë evakuuar dhe sipërfaqja e prekur ka kaluar 4,000 hektarë. Gjatë natës rreth 150 zjarrfikës pyjorë punuan në terren. Ministri rajonal i Presidencës, Shëndetësisë dhe Emergjencave në Andaluzia, Antonio Sanz, e përshkroi situatën si ende jashtëzakonisht të ndërlikuar 48 orë pas nisjes së zjarrit, duke theksuar se ndryshimet e vazhdueshme të drejtimit të erës dhe përhapja e prushit të ndezur po vështirësojnë punën e ekipeve. Zëvendëspresidentja e tretë dhe ministrja për Tranzicionin Ekologjik, Sara Aagesen, pritet të vizitojë Postën e Avancuar të Komandës në Niebla për të takuar drejtuesit e operacionit të emergjencës.
Në Castellón, vatra në Tírig riktheu ndërhyrjen e mjeteve ajrore për shuarjen e flakëve. Avionët dhe helikopterët u angazhuan që në orët e para të së dielës, pasi një ditë më parë autoritetet kishin urdhëruar rreth 700 banorë të komunës së Catí të qëndronin të izoluar në shtëpi. Rreth 200 efektivë në terren punuan gjatë gjithë natës; operacioni u vështirësua nga terreni i thyer dhe prania e përrenjve dhe lugëve. Ministri i Emergjencave dhe Brendshme i Valencias, Juan Carlos Valderrama, tha se zjarri ka përfshirë rreth 395 hektarë brenda një perimetri prej 15 kilometrash. Në operacion janë angazhuar rreth 300 persona, 19 mjete ajrore dhe 50 njësi tokësore. Autoritetet paralajmërojnë se është ende herët për të folur për stabilizimin, por parashikimet meteorologjike për natën pritet të jenë më të favorshme.
Zjarri në Tírig është një nga katër vatrat që shpërthyen të premten në zonat e brendshme të Castellón; së bashku ato kanë prekur rreth 244 hektarë. Autoritetet dyshojnë se shkaktar mund të jenë goditjet e rrufeve gjatë stuhive, ndërsa hetimet i kryen njësia mjedisore Seprona. Situata është përmirësuar në Sierra Engarcerán, ku zjarri është vënë nën kontroll; rreth 45 hektarë u prekën dhe është hequr urdhri i izolimit, me rreth 91 banorë që u rikthyen në shtëpi. Ekipet e emergjencave vijojnë monitorimin për të parandaluar riaktivizimin e vatrave.
