Gjatë ditës janë raportuar 20 vatra zjarri: 11 mbeten aktive, 7 janë nën mbikëqyrje dhe 2 janë fikur. Në operacionet për përballimin e situatës janë angazhuar strukturat vendore dhe Forcat e Armatosura, me kapacitete tokësore dhe ajrore.
Vëmendja kryesore është te Mali i Dajtit, ku zjarri vazhdon të jetë aktiv dhe ndërhyrja mbështetet nga Forcat e Armatosura me efektivë, mjete dhe helikopter. Në Kryezi të Kavajës, pranë forcave zjarrfikëse është angazhuar edhe një avion Air Tractor. Situatë aktive raportohet edhe në Dibër, veçanërisht në zonën Lundre–Madhesh të Matit.
Në Lezhë, puna vijon në zonën Kalivaç–Zimaj–Kashnjet, me mbështetje edhe nga dy helikopterë të Forcave të Armatosura. Në Qarkun Shkodër, vatra Bardhaj–Myselim mbetet aktive; në operacion janë të përfshira strukturat vendore, vullnetarët dhe Forcat e Armatosura, përfshirë dy helikopterë. Aktiv mbetet gjithashtu zjarri në Kulumri të Fushë-Arrëzit.
Raportohet edhe për vatra aktive në Kropisht të Selenicës dhe Vokopolë të Poliçanit, si dhe në zona të tjera. Disa vatra në qarqe të ndryshme — Korçë, Elbasan, Durrës, Fier, Kukës dhe Shkodër — ndodhen nën mbikëqyrje. Në zonën Drizë–Peshtan–Frakull të Fierit, situata është për momentin nën mbikëqyrje.
Agjencia Kombëtare e Mbrojtjes Civile ndjek në mënyrë të pandërprerë situatën në gjithë territorin, në koordinim të ngushtë me prefekturat, bashkitë dhe të gjitha strukturat e sistemit të Mbrojtjes Civile. Kapacitetet operacionale mbeten të angazhuara në terren dhe në gatishmëri për të ndërhyrë aty ku situata e kërkon.
Prioritet i ndërhyrjeve mbetet mbrojtja e jetës, banesave dhe pasurisë së qytetarëve; si dhe vijimi i monitorimit dhe menaxhimit të vatrave që janë aktive ose nën mbikëqyrje.
