Pedagogët edhe sot kanë bojkotuar auditorin dhe janë mbedhur në protestë, ku kërkojnë që t’u plotësohen kërkesat.
Ata janë shprehur se nëse nuk do të ketë rritje rroge do të vijojnë protestën e tyre. Në lidhje me këtë kreu i Sindikatës së Arsimit të Lartë, Sandër Kovaçi i ka lexuar edhe një letër të hapur drejtuar presidentit Bajram Begaj si dhe Ambasadave në vend.
Kovaçi kërkon mbështetjen, teksa tha se paplotësuar kërkesat bojkon nuk do të marrë fund.
“Letër e hapur drejtuar Presidentit, Kryetares së Kuvendit, Kryeministrit, për dijeni Ambasadës Amerikane, Ambasadës së Britanisë dhe shteteve të BE në vendin tonë.
Prej më se dy javësh trupa akademike ka filluar protesta. Gjykojmë se mungesa e mbështetjes ka ndikuar në largimin e rinisë së vendit, është larguar një pjesë e stafit akademik. Boshatisja e auditorëve është çështje e njohur tashmë. Qeveria është përpjekur t’i konsiderojë politike, me qëllim për ti lënë të pazgjidhura këto kërkesa. Çdo kërkesë e paraqitur ka si synim rritjen e cilësisë së arsimit, frenimin e largimit të rinisë.
Me anë të kësaj letre të hapur, synojmë t’iu informojmë duke kërkuar mbështetje për situatën aktuale. Rama të ndalojë intimidimin dhe të trajtoje me seriozitet kërkesat. Të plotësohen kërkesat për të marrë fund bojkoti dhe të rinisë mësimdhënia” tha ai.
Kujtojmë që kryeministri Edi Rama është shprehur qartë që nuk do të ketë rritje pagash të paktën deri sa të kalojë dimri.
