Sindikata e Gardës së Republikës kërkon rritje të pagave dhe i bën thirrje strukturave përgjegjëse që të ndërmarrin hapa konkretë për përmirësimin e trajtimit financiar të punonjësve të Gardës. Përmes një reagimi publik, ata i rikujtuan Sektorit të Financës dhe institucioneve përkatëse që të paraqesin urgjentisht pranë Ministrisë së Financave programin e detajuar për rritjen e pagave, duke theksuar se kërkesa e mëparshme për dialog nuk mund të shtyhet më.
Sindikata nënvizon se që prej vitit 2001 institucioni i Gardës së Republikës nuk është vlerësuar financiarisht në nivelin e duhur. Historikisht, ata thonë, kanë pasur një diferencë pagese prej 15,000 lekësh më shumë në krahasim me punonjësit e institucioneve të tjera të sigurisë, por kjo diferencë tashmë është shkrirë, duke cënuar dinjitetin ekonomik të punonjësve të Gardës.
Në rastin e tyre, Sindikata rendit arsyet që e bëjnë të domosdoshme rritjen e pagave: shërbimi karakterizohet nga presion i vazhdueshëm, gatishmëri maksimale dhe vështirësi të veçanta profesionale. Një element i rëndësishëm është përgjegjësia për sigurinë e personaliteteve të larta shtetërore, shqiptare dhe të huaja, ku “nuk mund të ketë vend për gabime”. Në reagim theksohet: “Zero tolerancë për gabime. Në profesionin tonë nuk duhet dhe nuk ka kurrë ‘herë të parë’ kur bëhet fjalë për cenimin apo rrezikimin e personaliteteve të larta shtetërore, vendas apo të huaj. Siguria e tyre është imazhi i vetë shtetit shqiptar.”
Sindikata kërkon reflektim dhe masë konkrete nga institucionet për përmirësimin e kushteve financiare, duke përsëritur se “të mbrosh shtetin me jetë kërkon që edhe shteti të të vlerësojë me dinjitet.” Ata presin që strukturat përgjegjëse të marrin hapa konkretë dhe të dorëzojnë programin e rritjes së pagave pranë Ministrisë së Financave pa vonesa, duke theksuar se situata nuk mund të pritet më.
