Policia indiane ka arrestuar S.Ranganathan, pronarin e kompanisë Sresan Pharma, pas vdekjes së 17 fëmijëve që konsumuan shurupin e kollës ‘Coldrif’. Ngjarja u konfirmua nga një oficer i lartë i policisë për agjencinë Reuters. Arrestimi ndodhi në Chennai, Tamil Nadu, dhe Ranganathan pritet të dalë para gjykatës.
Të gjithë fëmijët që humbën jetën ishin nën pesë vjeç dhe ndërruan jetë muajin e kaluar. Analizat laboratorike zbuluan se ‘Coldrif’ përmbante dietilen glikol në përqendrim gati 500 herë mbi limitet e lejuara. Dietilen glikoli është një substancë toksike, e cila përdoret në industri si tretës dhe antifriz, por jo për qëllime farmaceutike.
Pas këtij incidenti tragjik, ‘Coldrif’ është ndaluar në disa rajone të Indisë. Megjithatë, ngjarja ka nxjerrë në pah dështime të dukshme në zbatimin e rregulloreve që kërkojnë që kompanitë farmaceutike të testojnë lëndët e para dhe seritë e produkteve përfundimtare. Kjo situatë ndodh pas rasteve të ngjashme në vitin 2023, ku shurupet indiane janë lidhur me vdekjen e më shumë se 10 fëmijëve në vende si Gambia, Uzbekistan dhe Kamerun, duke çuar në vendosjen e kontrollove më të rrepta për eksportet e shurupit të kollës nga qeveria indiane.
Edhe Organizata Botërore e Shëndetësisë (OBSH) ka reaguar në lidhje me këtë rast, duke theksuar se ai tregon një boshllëk të thellë në mbikëqyrjen e barnave që tregtohen brenda dhe jashtë Indisë. OBSH paralajmëroi gjithashtu se disa eksporte mund të jenë realizuar në mënyrë jozyrtare dhe të pakontrolluar, duke rritur shqetësimet për sigurinë e barnave në tregun global.
Ky incident thekson nevojën për përmirësimin e standardeve dhe kontrollit mbi prodhimin dhe shpërndarjen e produkteve farmaceutike në Indi, një treg që ka përjetuar kritikë të përsëritura për sigurinë e saj.
